Y dyddiad cau ar gyfer ysbaddu Cŵn Tarw XL yn nesáu

Diwedd mis Mehefin yw'r dyddiad cau ar gyfer sicrhau bod pob Ci Tarw XL sydd wedi'i eithrio wedi cael ei ysbaddu.

Rhaid i berchenogion Cŵn Tarw XL cofrestredig a oedd yn 12 mis neu'n hŷn ar 31 Ionawr 2024 drefnu i'w cŵn gael eu hysbaddu erbyn diwrnod olaf mis Mehefin eleni er mwyn sicrhau bod y Dystysgrif Eithrio yn parhau i fod yn ddilys.

Os na fydd perchenogion yn cyflwyno'r ffurflen Cadarnhau Ysbaddu i DEFRA erbyn 21 Gorffennaf, ni fydd y ci wedi'i eithrio mwyach.

Mae mesurau rheoli llym wedi'u rhoi ar waith ar gyfer Cŵn Tarw XL presennol. Rhaid iddynt gael eu cofrestru, eu microsglodynnu, eu hysbaddu a'u cadw ar dennyn ac wedi'u mwselu yn gyhoeddus, a rhaid bod yswiriant trydydd parti wedi'i drefnu ar eu cyfer gyda'r Ymddiriedolaeth Cŵn.

Rhoddwyd y mesurau hyn ar waith i wella diogelwch y cyhoedd a sicrhau bod y boblogaeth bresennol o Gŵn Tarw XL yn lleihau dros amser.

Gallai unrhyw un y canfyddir bod ganddo un o'r cŵn peryglus hyn ac nad yw'n bodloni'r rheolau llym wynebu erlyniad a chofnod troseddol a gallai ei gi gael ei atafaelu.

Ar gyfer Cŵn Tarw XL sydd eisoes wedi'u hysbaddu, rhaid i filfeddyg gwblhau a chyflwyno Ffurflen Cadarnhau Ysbaddu gyda'r perchennog.

Canllawiau ysbaddu:

• Os oedd eich ci yn llai na blwydd oed ar 31 Ionawr 2024, rhaid iddo gael ei ysbaddu a rhaid i'r dystiolaeth o hynny gael ei chyflwyno erbyn 31 Rhagfyr 2024
• Os oedd eich ci yn hŷn na blwydd oed ar 31 Ionawr 2024, rhaid iddo gael ei ysbaddu a rhaid i'r dystiolaeth o hynny gael ei chyflwyno erbyn 31 Mehefin 2024
• Os yw eich ci wedi'i ysbaddu eisoes, rhaid i filfeddyg gadarnhau hyn erbyn:

31 Rhagfyr 2024 ar gyfer cŵn a oedd yn llai na blwydd oed ar 31 Ionawr 2024

30 Mehefin 2024 ar gyfer cŵn a oedd yn hŷn na blwydd oed ar 31 Ionawr 2024