Mae tri pherson wedi'u canfod yn euog mewn cysylltiad â llofruddiaeth Daniel Rae ym mis Rhagfyr.

Bu farw Daniel, 30 oed, mewn eiddo ar Princess Street, Trefforest, nos Sul 17 Rhagfyr.

Yn dilyn ymchwiliad dan arweiniad Tîm Ymchwilio i Droseddau Mawr Heddlu De Cymru, mae Kieran Ashton Carter, 22 oed, o Birmingham, wedi'i ganfod yn euog o lofruddiaeth.

Mae Amy Jones, 37 oed, o Derwendeg Avenue, Glyncoch, Pontypridd, a Chad Joy, 33 oed, o Garth Avenue, Glyncoch, Pontypridd, wedi'u canfod yn euog o wyrdroi cwrs cyfiawnder.

Dywedodd y Ditectif Brif Arolygydd Paul Raikes: “Ychydig ar ôl 7.50pm nos Sul 17 Rhagfyr, cawsom adroddiad gan Wasanaeth Ambiwlans Cymru nad oedd Daniel yn anadlu mewn cyfeiriad ar Princess Street, Trefforest. Roedd wedi cael ei drywanu sawl gwaith yn ei glun, a bu ei anafiadau yn angheuol.

“Arweiniodd hyn at ymchwiliad heriol a chymhleth yn cynnwys adnoddau arbenigol o bob rhan o'r heddlu, er mwyn adnabod, dal ac erlyn y rheini a oedd yn gysylltiedig â marwolaeth Daniel Rae.

“Mae'r euogfarnau hyn yn dangos i'r rheini sy'n cyflawni trosedd, ni waeth sawl cam y byddwch yn ei gymryd i rwystro ymchwiliad, na fyddwn yn rhoi'r gorau iddi.

“Hoffwn estyn fy nghydymdeimlad i aelodau teulu Daniel Rae, a diolch iddynt am eu dealltwriaeth a'u cymorth yn ystod yr ymchwiliad.”

Disgwylir i'r tri gael eu dedfrydu ddydd Iau 26 Medi.