Cymryd camau yn erbyn cynhyrchu canabis
Cynnwys y prif erthygl
Yn ystod yr wythnosau diwethaf, mae swyddogion o dîm plismona yn y gymdogaeth Maesteg wedi cynnal tair gwarant chwilio yn y cwm, gan atafaelu canabis â gwerth stryd posib o fwy na £250,000.
Mae pob un o'r rhain wedi'u cysylltu â grwpiau troseddau cyfundrefnol ac wedi arwain at bobl yn cael eu cyhuddo a'u cadw yn y ddalfa.
Yn aml, mae pobl yn sôn am gynhyrchu a defnyddio canabis fel trosedd heb ddioddefwyr, ond nid yw hynny'n wir. Mae troseddau cyfundrefnol y tu ôl i lawer o'r ffatrïoedd canabis hyn. Mae'r troseddwyr yn ennill llawer o arian ar draul ein cymunedau ac maen nhw'n gwarchod eu planhigfeydd gan ddefnyddio trais a bygythiadau.
Beth bynnag fo'ch safbwynt ar ganabis, gall y troseddau difrifol a chyfundrefnol, a'r masnachu mewn pobl sy'n gysylltiedig â'r ffatrïoedd achosi niwed go iawn i'n cymunedau ac ariannu troseddau pellach.
Diolch i'r wybodaeth a'r cymorth rydym yn eu cael gan ein cymunedau, mae eich tîm plismona yn y gymdogaeth, gan weithio ochr yn ochr ag adrannau arbenigol, wedi atafaelu dros 1800 o blanhigion canabis o'r fath leoliadau dros y 12 mis diwethaf, wedi arestio 10 unigolyn, gydag ymchwiliadau i eraill i fyny'r cadwyn sydd ynghlwm â'r achosion hyn yn mynd rhagddynt o hyd.
Arwyddion Rhybuddio Cynnar
Mae'r Grwpiau Troseddu Cyfundrefnol sy'n cynhyrchu canabis ar raddfa eang yn aml yn defnyddio eiddo rhent i ymbellhau oddi wrth weithgarwch anghyfreithlon. Maent hefyd yn defnyddio eraill i fod yn wyneb i'r gweithgarwch. Mae'r unigolion hyn yn ymddangos yn ddilys ac yn barchus, ac yn aml yn cyflwyno eu hunain fel rhywun sydd â theulu ac wedi cael swydd newydd yn yr ardal leol, ac eisiau rhentu eiddo i'w ddefnyddio eu hunain. Ar ôl iddynt gymryd meddiant o'r eiddo, byddant yn diflannu o'r golwg a bydd eraill yn cymryd eu lle er mwyn dechrau cynhyrchu canabis.
Byddwch yn ddrwgdybus os:
- Bydd tenant yn dymuno talu sawl mis o rhent ag arian parod, ymlaen llaw – peidiwch â derbyn taliadau rhent ymlaen llaw heb wirio geirdaon a chefndir yr ymgeiswyr.
- Bydd gan y tenant symiau mawr o arian parod heb ffynhonnell amlwg o incwm.
- Byddwch yn derbyn ceisiadau i osgoi ymweld â'r eiddo. Efallai y bydd yr esboniad yn ymddangos yn un dilys ac efallai y byddant yn gofyn am gael eich cyfarfod rywle arall i dalu'r rhent yn hytrach nag ymweld â'r cyfeiriad.
- Bydd camau sydyn i ddiogelu'r eiddo'n well yn cynnwys cloeon cryf neu larymau ar ddrysau mewnol.
Arwyddion Amlwg
Mae rhai o'r arwyddion yn cynnwys:
- Efallai y bydd y cymdogion yn sylwi nad yw preswylwyr eiddo yn byw yn y cyfeiriad yn llawn amser, neu ond yn ymweld am gyfnod byr bob dydd, neu hyd yn oed bob deuddydd.
- Gwifrau trydanol yr ymyrrwyd â nhw – i gysylltu â'r prif gyflenwad.
- Cynnydd neu leihad sydyn mewn biliau trydan.
- Goleuadau pwerus sydd ymlaen drwy'r dydd neu'r nos – mae tyfwyr yn defnyddio goleuadau 600-watt i gyflymu'r broses o dyfu planhigion.
- Ffenestri wedi'u tywyllu – defnyddio plastig du neu ffabrig trwm ar y ffenestri (fel arfer wedi'u cuddio gan fleinds neu lenni rhwyd).
- Cryn leithder yn yr eiddo – mae gweithrediadau tyfu yn gofyn am lawer o leithder, felly efallai y byddwch yn sylwi ar arwyddion o gyddwysiad sylweddol, paent yn pilio, carped yn llwydo, neu fyrddau wal.
- Efallai y caiff tiwbiau mawr (fel tiwbiau gollwng peiriant sychu dillad) eu defnyddio i gael yr aer poeth allan o'r eiddo, neu i ddod ag aer ffres i mewn, yn gwthio allan o ffenestr.
- Bagiau bin llawn coesynnau a gwreiddiau planhigion Canabis yn y bin sbwriel neu'r ardd.
Y Canlyniadau
Mae'r rhain yn cynnwys:
- Gostyngiad yng ngwerthoedd eiddo.
- Cyhoeddusrwydd niweidiol i'r cwmni rhentu.
- Colli rhent.
- Costau atgyweirio/adnewyddu sylweddol.
- Difrod Sylweddol
- Cynnydd mewn premiymau yswiriant eiddo.
- Cynnydd yn y risg o dân neu lifogydd yn sgil gweithrediadau tyfu canabis.
- Tenantiaid a chymdogion gelyniaethus.
- Cosbau, gan gynnwys asedau yn cael eu caffael gan yr heddlu, colli eiddo a difrod i eiddo, yn dilyn camau gorfodi gan yr heddlu.
- Cynnydd mewn risg o ddenu gweithgareddau troseddol eraill i'r eiddo.
Datrysiadau
Fel perchennog eiddo/landlord/cwmni gosod, mynnwch eich bod yn ailymweld â'r eiddo ychydig wythnosau ar ôl i'r cytundeb gael ei lofnodi.
Mae'r cymdogion a'r cyhoedd yn cadw golwg a gallant roi gwybod am unrhyw amheuon.
I roi gwybod am ddigwyddiad cynhyrchu canabis posibl, ffoniwch Crimestoppers yn ddienw ar 0800 555111, neu rhowch wybod yn uniongyrchol i Heddlu De Cymru drwy 101, wyneb yn wyneb, neu drwy ddefnyddio ein system rhoi gwybod ar-lein.
Er mwyn cael rhagor o wybodaeth am sut i adnabod arwyddion ffatri canabis, ewch i: https://crimestoppers-uk.org/keeping-safe/community-family/cannabis-cultivation
Gallwch roi gwybod am bryderon drwy un o'r ffyrdd canlynol:
💬 Sgwrs Fyw https://www.south-wales.police.uk/cy-GB/
📞 101
📞 Ffoniwch Crimestoppers yn ddienw ar 0800 555111
Mewn argyfwng, ffoniwch 999 bob amser
Am ragor o wybodaeth am ble i gael cymorth yn yr ardal, ewch i:
DASPA - DRUG & ALCOHOL SINGLE POINT OF ACCESS
DAN 247 – Llinell Gymorth Cyffuriau ac Alcohol Cymru