Gwobrau Dewrder Cyhoeddus

Roedd pensiynwr a ymladdodd â lleidr, dwy fenyw a ymyrrodd yn ystod ymosodiad angheuol ffyrnig a chriw o ddynion chwim eu meddwl a achubodd deulu yn sgil ffrwydrad nwy ymhlith y rhai a gyfarfu â'r Prif Gwnstabl Jeremy Vaughan yr wythnos diwethaf i dderbyn Gwobr Dewrder Cyhoeddus gan yr Heddlu.

Mae'r gwobrau cenedlaethol yn cydnabod unigolion am weithredoedd eithriadol sy'n dangos dewrder neu ddyletswydd ddinesig wrth gynorthwyo'r heddlu. Derbyniodd llawer o'r rhai a wobrwywyd yn lleol wahoddiad i gwrdd â'r Prif Gwnstabl Vaughan yn ein pencadlys ym Mhen-y-pont ar Ogwr. Yno, diolchwyd iddynt yn bersonol am eu gweithredoedd, a'r effaith y maen nhw wedi'i chael ar eu cymunedau.

Cyflwynwyd gwobrau i:

• Trevor Weston, 80 oed, gyrrwr bysiau wedi ymddeol, a ymladdodd â lleidr wrth ymyl peiriant codi arian yng Nghaerdydd, gan ei orfodi i ffoi'n waglaw.
• Jonathan Wright – aelod o'n hadran TGCh ein hunain – a neidiodd i mewn i afon i helpu i achub menyw a oedd wedi mynd i drafferthion wrth geisio achub ei gi o'r llif cyflym. Ar ôl achub y fenyw a'i anifail anwes, cerddodd Jonathan i ffwrdd heb dderbyn y ganmoliaeth am ei weithredoedd.
• Ayette Bounouri a Lisa Way, a beryglodd eu bywydau i ddiogelu John Rees, yr ymosododd menyw â chyllell arno mewn siop ym Mhen-y-graig. Cafodd Mr Rees, a anafwyd yn angheuol er gwaethaf gweithredoedd anhunanol y menywod, wobr ar ôl ei farwolaeth ac yntau hefyd wedi ceisio diogelu dwy fenyw arall yn ystod y digwyddiad.
• Cameron Nation, Jeffrey Davies, Leighton Williams, Stephen Lewis a Kevin O’Sullivan, a weithiodd gyda'i gilydd i achub mam a'i dau blentyn bach ar ôl i ffrwydrad nwy ddinistrio eu cartref ym Mlaendulais a'u dal yn y rwbel.
• Rhys Walker a James Howe, a beryglodd eu bywydau er mwyn helpu swyddogion a oedd yn ceisio cael dyn hunanladdol i fan diogel.
• Menyw, nad yw am gael ei hadnabod, a ymladdodd ag ymosodwr treisgar yn ystod lladrad mewn siop. Oherwydd ei thaerni yn ystod y profiad brawychus hwn bu'n rhaid i'r ymosodwr ffoi heb ddim.

“Mae cyflwyno Gwobrau Dewrder Cyhoeddus yr Heddlu wedi rhoi cyfle i mi glywed hanesion am arwriaeth wirioneddol. Bu diweddglo trist i rai, a diweddglo hapus i eraill. Ond un peth sydd wedi codi ym mhob un yw'r dyngarwch, yr ymdeimlad o gymuned.”

– Y Prif Gwnstabl Jeremy Vaughan.