Ymchwiliad i lofruddiaeth Tomasz Waga: Unigolyn dan amheuaeth wedi'i estraddodi o Albania

Mae ditectifs sy'n ymchwilio i farwolaeth Tomasz Waga ar 28 Ionawr 2021 wedi cyhuddo dyn arall mewn cysylltiad â'i lofruddiaeth.

Cafodd Gladis Mehalla, 20 oed, ei arestio yn Albania a'i estraddodi ddydd Iau, 20 Ionawr mewn cydweithrediad llwyddiannus a oedd yn cynnwys Ditectifs Troseddau Mawr Heddlu De Cymru ac asiantaethau gorfodi'r gyfraith eraill y DU ac Albania.

Mae disgwyl iddo ymddangos gerbron Llys Ynadon Caerdydd heddiw (dydd Gwener 21 Ionawr).
Mae disgwyl i dri dyn arall – Josif Nushi, Mihal Dhana a Mario Qato – sefyll eu prawf ar 1 Mawrth wedi'u cyhuddo o lofruddiaeth.

Mae unigolion eraill a gafodd eu harestio yn ystod yr ymchwiliad hir a chymhleth hwn ar fechnïaeth tan y treial mewn perthynas â materion eraill.

Daeth aelod o'r cyhoedd o hyd i gorff Tomasz am tua 11.30pm nos Iau 28 Ionawr, 2021 ar Westville Road, Pen-y-lan, Caerdydd.
Cafodd Mehalla ei arestio yn Albania ar 2 Hydref, 2021, ar ôl i warant arestio ryngwladol ar gyfer llofruddiaeth a niwed corfforol difrifol gael ei chyhoeddi gan Heddlu De Cymru.

Cyhoeddodd y Swyddfa Gartref gais estraddodi a gafodd ei orchymyn gan Lys yn Albania yn dilyn hynny ar 5 Tachwedd, 2021.

Cafodd dau ddyn arall, Josif Nushi a Mihal Dhana, a gyhuddwyd mewn cysylltiad â llofruddiaeth Tomasz eu hestraddodi o Baris, Ffrainc, ym mis Gorffennaf y llynedd.

Dywedodd y Ditectif Brif Arolygydd Mark O'Shea, yr Uwch Swyddog Ymchwilio: “Nid yw ffiniau rhyngwladol yn rhwystr i ni wrth olrhain pobl dan amheuaeth o lofruddiaeth yn y DU, mae gennym gysylltiadau gwych â chydweithwyr gorfodi'r gyfraith ar hyd a lled Ewrop, gan gynnwys Albania.

“Rwy'n awyddus iawn nawr i gadarnhau lleoliad dau wladolyn arall o Albania yr ydym yn chwilio amdanynt mewn cysylltiad â'r drosedd hon. Hoffwn apelio ar gymuned Albania yn y DU a thramor i'n cynorthwyo i ddod o hyd i'r ddau ddyn rydym yn chwilio amdanynt. Mae gwobr Crimestoppers ar gael am wybodaeth a fydd yn arwain at arestiad.

“Gall gwybodaeth hefyd gael ei darparu'n uniongyrchol i ni drwy'r Porth Cyhoeddus Ymchwiliadau Mawr. Bydd unrhyw wybodaeth yn cael ei thrin yn gwbl gyfrinachol. Mae teulu Mr Waga yn parhau i gael eu cefnogi gan Swyddogion Cyswllt â Theuluoedd ac yn cael y wybodaeth ddiweddaraf wrth i'r achos barhau i ddatblygu.

“Hoffwn ddweud wrth y ddau unigolyn arall rydym yn chwilio amdanynt ei fod er lles i chi ddod ymlaen o'ch gwirfodd a rhoi eich adroddiadau i ni o'r hyn a ddigwyddodd yng Nghaerdydd ar noson 28 Ionawr 2021.”

Y ddau ddyn arall sydd ar amheuaeth o lofruddiaeth yw:

• Elidon Elezi, 22 oed, cyfeiriad hysbys diwethaf yn ardal East Finchley, Llundain.
• Artan Pelluci, 29 oed, cyfeiriad hysbys diwethaf yn ardal Cathays, Caerdydd.

Atafaelwyd nifer o gerbydau fel rhan o'r ymchwiliad, ond mae'r ymchwiliad yn dal i ganolbwyntio ar leoliad Mercedes C200 Sport arian/llwyd, rhif cofrestru BK09 RBX.

Gwelwyd y Mercedes ddiwethaf, sydd â chysylltiadau â'r ymchwiliad ac a allai gynnwys tystiolaeth hanfodol, yng Nghaerdydd ar y diwrnod y cafodd corff Mr Waga ei ddarganfod.

Mae Crimestoppers yn parhau i gynnig gwobr o £5,000 am wybodaeth am yr unigolion dan amheuaeth nad ydynt wedi eu dal eto yn ogystal â lleoliad y Mercedes.

Mae perchennog cofrestredig blaenorol y cerbyd yn byw yn ardal y Tyllgoed yng Nghaerdydd, ac nid yw'n gysylltiedig â'r ymchwiliad hwn o gwbl.

Dylai unrhyw un sydd â gwybodaeth ffonio 101 / [email protected]neu ddarparu gwybodaeth ar-lein drwy'r Porth Cyhoeddus Ymchwiliadau  Mawr:https://mipp.police.uk/operation/62SWP21B26-PO1