Arestio dyn a'i garcharu ar yr un diwrnod ac y gwnaeth ladrata o boced dyn 79 oed

Mae dyn wedi cael ei garcharu ar ôl lladrata o boced dyn 79 oed ar Hopkinstown Road, Pontypridd.

Penderfynodd Liam Jonathan, 33 oed o Lyncoch, gymryd mantais o ddyn 79 oed wrth gerdded ar hyd y ffordd ddydd Mawrth 5 Gorffennaf 2022.

Gwthiodd Jonathan y dyn oedrannus o'r tu ôl, a rhoddodd ei law ym mhocedi'r dyn i ddwyn ei gardiau a'i ffôn symudol, gan adael y dyn oedrannus wedi dychryn ac mewn sioc.

Yn ffodus, gwelodd aelod o'r cyhoedd yr hyn a ddigwyddodd o'i char a stopiodd i helpu a ffonio'r heddlu.

O fewn tair awr o wneud yr alwad, roedd Jonathan wedi cael ei adnabod, ei leoli a'i arestio am y lladrad.

Dychwelwyd yr eiddo oedd wedi'i ddwyn i'r dyn yn ddiweddarach y diwrnod hwnnw.

Ymddangosodd Jonathan gerbron Llys y Goron Merthyr Tudful ddydd Iau 11 Awst, lle plediodd yn euog a chael ei ddedfrydu i ddwy flynedd o garchar.

Dywedodd y Ditectif Gwnstabl Adam Carra:

“Mae hon yn enghraifft wych o adrannau gwahanol yn gweithio gyda'i gilydd fel tîm i adnabod a dal unigolyn treisgar.

“Rwy’n llwyr groesawu’r ddedfryd hon o garchar a dylai lladron pocedi weld hyn fel rhybudd.

“Hoffwn ddiolch i'r aelod o'r cyhoedd a wnaeth yn siwr bod y dyn yn dychwelyd adref yn ddiogel ac a ffoniodd yr heddlu ar ei ran, gan roi disgrifiad gwych o Jonathan a rhoi gwybod i ba gyfeiriad yr aeth ar ôl y lladrad, yn ogystal ag i dimau Ymateb a Phlismona yn y Gymdogaeth Pontypridd am ddelio â'r ymchwiliad yn gyflym ac yn effeithiol.

“Os bydd unrhyw un yn gweld gweithgarwch amheus, naill ai ffoniwch yr heddlu ar unwaith, neu rhowch wybod i aelod o staff siop neu staff diogelwch.”