Un Llais Cyfartal: Ugain Mlynedd o'r Rhwydwaith Cydraddoldeb Rhywiol

Ym mis Medi dethlir 20 mlynedd ers sefydlu Cymdeithas yr Heddlu Benywaidd De Cymru, neu Rwydwaith Cydraddoldeb Rhywiol Heddlu De Cymru fel y'i gelwir heddiw.

Arwyddair y Gymdeithas oedd ‘Una Voce, Pari Passu’ – Un Llais Cyfartal. Roedd yr arwyddair yn crynhoi nodau'r Gymdeithas, sef darparu amgylchedd gwaith cadarnhaol i swyddogion a staff benywaidd, a nodi gwahaniaethu yn erbyn menywod, mynd i'r afael ag ef a'i ddileu.

Erbyn diwedd y 2000au, cafwyd sawl trobwynt a wnaeth roi hwb i gydraddoldeb rhywiol a chynyddu cynrychiolaeth menywod mewn adrannau arbenigol o fewn yr heddlu. Bu trobwynt pwysig iawn yn 2008 pan wnaeth y Gymdeithas weithio'n llwyddiannus gyda storfeydd lifrai yr heddlu i nodi a chynhyrchu'r dillad mwyaf cyfforddus oedd ar gael i swyddogion beichiog.

Parhaodd y Gymdeithas i wneud cynnydd yn y 2010au, gan gymryd camau breision i sicrhau bod cysylltiadau cenedlaethol a rhyngwladol yn cael eu sefydlu â Chymdeithas Ryngwladol Menywod yn yr Heddlu (IAWP) a Chymdeithas Prydain ar gyfer Menywod yn yr Heddlu (BAWP). Mae'r cydberthnasau hyn wedi mynd o nerth i nerth, ac mae llawer o swyddogion benywaidd o dde Cymru wedi mentora swyddogion dramor.

Yn 2016 cafodd y Gymdeithas ei hailfrandio a'i hailstrwythuro, gan greu'r Rhwydwaith Cydraddoldeb Rhywiol. Wrth ailfrandio, cafodd dynion eu croesawu'n aelodau, er mwyn bod yn gyson â HeForShe, yr ymdrech fyd-eang wedi'i harwain gan y Cenhedloedd Unedig i gynnwys dynion a bechgyn yn y gwaith o ddileu'r rhwystrau cymdeithasol a diwylliannol sy'n atal menywod a merched rhag gwireddu eu potensial. Heddiw, mae aelodau gwrywaidd y rhwydwaith yn chwarae rhan yn y gwaith o annog mwy o gefnogaeth i fenywod, a sicrhau bod menywod yn cyflawni rolau anodd eu cyrraedd yn y sefydliad.

Dros yr ugain mlynedd diwethaf, mae'r rhwydwaith wedi gweithio'n galed i gefnogi datblygiad swyddogion a staff benywaidd, a'u helpu i gyflawni eu potensial. Mae hefyd yn parhau i flaenoriaethu iechyd a llesiant cydweithwyr benywaidd, ac mae'n mynd ati i chwilio am gyfleoedd i ddarparu mwy o gefnogaeth o ran mamolaeth, y menopos, a gofal cyn ac ar ôl rhoi genedigaeth. Dros y blynyddoedd diwethaf, mae'r gefnogaeth hon wedi cael ei rhoi i gydweithwyr gwrywaidd hefyd er mwyn rhannu'r rôl gofal sylfaenol a hyrwyddo cydbwysedd bywyd a gwaith.

Wrth siarad am yr ugainmlwyddiant, dywedodd y Prif Uwch-arolygydd a Phennaeth Gwasanaethau Corfforaethol, Joanna Maal:

"Rwyf wedi gweld y modd y mae'r Gymdeithas Menywod yn yr Heddlu wedi tyfu a datblygu'n Rhwydwaith Cydraddoldeb Rhywiol, fel y mae heddiw, sy'n rhoi pwyslais cryf ar gynhwysiant, a chefnogi pob cydweithiwr ni waeth beth fo'i rôl, rheng na rhywedd.
"Mae'r Rhwydwaith wedi bod ynghlwm wrth waith ardderchog i gefnogi ac annog datblygiad swyddogion a staff mewn ffyrdd creadigol iawn, ac mae hefyd yn buddsoddi cryn dipyn o amser ac ymroddiad i fynd i'r afael â materion hynod bwysig megis aflonyddu rhywiol a datblygiad proffesiynol.
"Yn rhyfeddol, mae'r rhwydwaith yn parhau i ddatblygu drwy arbenigedd ac egni'r bobl sy'n rhan ohono ac sy'n credu'n gryf yn ei ddiben, ac mae croeso cynnes i unrhyw aelod o staff neu swyddog sydd â diddordeb mewn chwarae rhan hollbwysig yng ngwaith y Rhwydwaith."

Yn y fideo byr hwn, mae cyn-aelodau ac aelodau presennol o'r Rhwydwaith yn siarad am eu rolau, a rhai o'r blaenoriaethau sy'n dal i fod yn berthnasol.

I gael rhagor o wybodaeth am y Rhwydwaith Cydraddoldeb Rhywiol, ewch i'n tudalen Cymdeithasau Staff. Gallwch hefyd ddilyn y Rhwydwaith ar Twitter yn: @swpgen.