Cynllun ildio arfau ymosodol di-enw yn rhoi cyfle i'r cyhoedd gyflwyno arfau y mae bellach yn drosedd i feddu arnynt

Bydd Heddlu De Cymru yn cynnal cynllun ildio arfau ymosodol dienw i roi'r cyfle i'r cyhoedd gyflwyno arfau er mwyn eu tynnu oddi ar y strydoedd a helpu i atal achosion o drais difrifol.

Cynhelir y cynllun rhwng 20 Hydref a 20 Rhagfyr.

Mae newidiadau i ddeddfwriaeth a ddeilliodd o Ddeddf Arfau Ymosodol 2019 yn gynharach eleni yn golygu ei bod bellach yn drosedd i feddu ar eitemau penodol megis dyrnau haearn, sêr taflu a chyllyll sombi, hyd yn oed yn breifat.

Mae hefyd yn cynnwys diffiniad wedi'i ddiweddaru o gyllyll clec i adlewyrchu newidiadau i ddyluniad arfau, a gwaharddiad ar feddu ar gyllyll clec a chyllyll disgyrchiant yn breifat. Roedd eisoes yn anghyfreithlon meddu ar gyllell neu arf ymosodol yn gyhoeddus.

Bydd cyflwyno mesurau o'r fath yn rhoi ffyrdd eraill i'r heddlu helpu i atal pobl rhag meddu ar gyllyll ac ymwneud â throseddau cyllyll.

Mae Heddlu De Cymru yn annog y cyhoedd i ildio arfau fel rhan o'i gynllun amnest, a gynhelir rhwng 20 Hydref a 20 Rhagfyr.

Gellir ildio arfau yng ngorsafoedd yr heddlu, lle y bydd y biniau wedi'u gosod wrth y ddesg flaen yn y lleoliadau canlynol:

• Gorsaf Heddlu Canol Abertawe (SA1 5EA)
• Gorsaf Heddlu Castell-nedd (SA11 3BW)
• Gorsaf Heddlu Pontypridd (CF37 2TR)
• Gorsaf Heddlu Pen-y-bont ar Ogwr (CF31 1BZ)
• Gorsaf Heddlu Bae Caerdydd (CF63 1TD)
• Gorsaf Heddlu Canol Caerdydd (CF10 3NN)
• Gorsaf Heddlu'r Barri (CF63 1TD)

Mae'r cynllun hwn yn ychwanegol at yr amnestau arfau a chyllyll a gynhelir yn rheolaidd gan heddluoedd.

Dywedodd y Ditectif Brif Arolygydd Jason Herbert:

“Er mai ychydig iawn o bobl sy'n cario cyllyll yn Ne Cymru yn rheolaidd, rydym yn parhau i fod yn ymrwymedig i fynd i'r afael â throseddau cyllyll.
“Bydd pob arf a gaiff ei ildio drwy'r cynllun hwn yn golygu bod un arf yn llai ar gael i'w ddefnyddio mewn ffordd amhriodol. Manteisiwch ar y cynllun hwn – gallech achub bywyd drwy wneud hynny.”

Mae canllawiau pellach ar gael sy'n cynnwys rhestr lawn o'r eitemau dan sylw: Offensive Weapons Act (nbcc.police.uk)