Llofruddiaeth Tomasz Waga: Dau ddyn arall yn cael eu cyhuddo
Cynnwys y prif erthygl
Mae ditectifs sy'n ymchwilio i farwolaeth Tomasz Waga ar 28 Ionawr 2021 wedi cyhuddo dau ddyn arall mewn cysylltiad â'i lofruddiaeth, gan godi'r cyfanswm presennol i wyth.
Cyhuddwyd Josif Nushi, 26 oed, o Ben-y-lan, Caerdydd a Mihal Dhana, 28 oed, o'r Waun Ddyfal, Caerdydd o lofruddiaeth.
Cafodd Nushi a Dhana eu harestio yn flaenorol ym Mharis, yn dilyn ymholiadau helaeth gan Dîm Ymchwilio i Droseddau Mawr Heddlu De Cymru.
Cafodd Josif Nushi ei estraddodi ddydd Iau ac ymddangosodd gerbron Llys Ynadon Caerdydd ddydd Gwener, 23 Gorffennaf, a bydd yn ymddangos nesaf gerbron Llys y Goron Caerdydd ddydd Mawrth 27 Gorffennaf.
Daeth aelod o'r cyhoedd o hyd i gorff Tomasz am tua 11.30pm nos Iau 28 Ionawr ar Westville Road, Pen-y-lan, Caerdydd.
Mae chwe dyn arall eisoes wedi cael eu cyhuddo mewn cysylltiad â'i farwolaeth ac yn cael eu cadw yn y ddalfa yn aros am achos llys.
Dywedodd DCI Mark O'Shea, Uwch-swyddog Ymchwilio:
“Bu'r broses o estraddodi Josif Nushi a Mihal Dhana o Baris yn ymgyrch dan arweiniad Swyddogion Troseddau Mawr Heddlu De Cymru, cydweithwyr o'r Ganolfan Cydgysylltu Troseddau Rhyngwladol, yr Asiantaeth Troseddu Genedlaethol ac awdurdodau Ffrainc.
“Ni fydd ffiniau rhyngwladol yn ein rhwystro wrth fynd ar ôl pobl yr amheuir eu bod wedi llofruddio yn y DU. Mae gennym gysylltiadau rhagorol â chydweithwyr gorfodi'r gyfraith ledled Ewrop, gan gynnwys Albania. Rwy’n dweud wrth y tri unigolyn rydym yn chwilio amdanynt, y byddai o fudd i chi fynd at yr heddlu o'ch gwirfodd a dweud wrthym beth ddigwyddodd ar y noson honno ym mis Ionawr.”
Mae'r heddlu'n parhau i chwilio am dri dyn arall ar amheuaeth o lofruddiaeth, sef:
Gledis Mehalla, 19 oed, cyfeiriad hysbys diwethaf yn ardal y Waun Ddyfal, Caerdydd.
Elidon Elezi, 22 oed, cyfeiriad hysbys diwethaf East Finchley, Llundain.
Artan Pelluci, 29 oed, cyfeiriad hysbys diwethaf yn ardal y Waun Ddyfal, Caerdydd.
Atafaelwyd nifer o gerbydau fel rhan o'r ymchwiliad, ond mae'r ymchwiliad yn dal i ganolbwyntio ar leoliad Mercedes C200 Sport arian/llwyd, rhif cofrestru BK09 RBX.
Gwelwyd y Mercedes ddiwethaf, sydd â chysylltiadau â'r ymchwiliad ac a allai gynnwys tystiolaeth hanfodol, yng Nghaerdydd ar y diwrnod y cafodd corff Mr Waga ei ddarganfod.
Mae Taclo'r Tacle yn parhau i gynnig gwobr o £5,000 am wybodaeth am y tri unigolyn dan amheuaeth nad ydynt wedi eu dal eto yn ogystal â lleoliad y Mercedes.
Mae perchennog cofrestredig blaenorol y cerbyd yn byw yn ardal y Tyllgoed yng Nghaerdydd, ac nid yw'n gysylltiedig â'r ymchwiliad hwn o gwbl.
Dylai unrhyw un sydd â gwybodaeth ffonio 101 / anfon e-bost i [email protected] neu ddarparu gwybodaeth ar-lein drwy'r Porth Cyhoeddus Ymchwiliadau Mawr: https://mipp.police.uk/operation/62SWP21B26-PO1