Apêl i ffeindio Mohammed Ali Ege – Diweddariad

Mae ditectifs sy'n chwilio am y dyn y mae'r heddlu fwyaf awyddus i'w ddal yng Nghymru – Mohammed Ali Ege – yn dilyn llwybrau ymholi newydd wrth i'r ymdrech i'w ddal barhau.

Mae gwybodaeth wedi dod i law o ganlyniad i apêl gyhoeddus ddiweddar a hoffai Heddlu De Cymru ddiolch i'r unigolion hynny sydd wedi bod mewn cysylltiad.

Rydym yn parhau i apelio am wybodaeth.

Ddydd Sul, 11 Ebrill, nodwyd 11 mlynedd ers llofruddiaeth Aamir Siddiqi yng Nghaerdydd.

Cafodd Aamir ei lofruddio'n greulon yng nghartref ei deulu yn y Rhath brynhawn dydd Sul, 11 Ebrill 2010, wrth iddo aros am ei athro Corân, ac yntau ond 17 mlwydd oed.

Mae'r heddlu yn parhau i chwilio am un dyn, un o'r bobl y mae'r heddlu fwyaf awyddus i'w dal yng Nghymru, mewn cysylltiad â llofruddiaeth Mohammed Ali Ege, o ardal Glan yr Afon, Caerdydd.

Gwnaeth Ege ffoi i India cyn i'r heddlu allu ei arestio mewn cysylltiad â llofruddiaeth Aamir.

Cafodd ei arestio yn India yn 2013, ond yn 2017, wrth aros i gael ei estraddodi, gwnaeth ddianc o'r ddalfa yn India.

Pedair blynedd yn ddiweddarach, mae ei leoliad presennol yn dal i fod yn anhysbys.

Mae ditectifs sy'n arwain yr ymdrech i'w ddal wedi rhyddhau lluniau newydd o Ege a dynnwyd ar ôl iddo gael ei arestio yn India yn 2013 yn y gobaith y bydd unrhyw un sydd wedi'i weld yn ddiweddar yn rhoi gwybod i'r heddlu. Gallai'r lluniau newydd hyn fod yn hollbwysig wrth geisio dod o hyd i Ege.

Rydym yn parhau i weithio gyda'r Asiantaeth Troseddu Cenedlaethol ac asiantaethau gorfodi'r gyfraith rhyngwladol i ddod o hyd iddo a'i estraddodi i'r DU.

Mae dau ddyn arall a gafwyd yn euog o lofruddiaeth Aamir yn parhau i fwrw dedfrydau oes yn y carchar.

Mae swyddogion cyswllt â theuluoedd arbenigol yn parhau i gefnogi a rhoi'r wybodaeth ddiweddaraf i deulu Aamir.

Rydym yn annog unrhyw un sydd â gwybodaeth am leoliad Mohammed Ali Ege i gysylltu â ni.

Allwch chi helpu? Gallwch roi gwybodaeth drwy:

Porth Cyhoeddus Digwyddiadau Mawr: Porth Cyhoeddus (mipp.police.uk)

Ffonio 101 gan ddyfynnu cyfeirnod 1700150924

Ffonio Taclo'r Tacle yn ddienw ar 0800 555 111