Ymgais i ladrata oddi wrth berchennog cŵn: Y diweddaraf am yr ymchwiliad

Ymgais i ladrata oddi wrth berchennog cŵn: Y diweddaraf am yr ymchwiliad

Mae ditectifs sy'n ymchwilio i ymgais i ladrata oddi wrth berchennog cŵn ym Mhentwyn, Caerdydd, wedi rhyddhau lluniau 'e-ffit' o dri unigolyn dan amheuaeth. 

Digwyddodd yr ymgais amser cinio ddydd Iau, 25 Chwefror ar y llwybr coediog rhwng Rhodfa'r Dwyrain ac Afon Tredelerch ger Pentwyn.

Roedd dyn 30 oed yn mynd â'i ddau gi am dro ger Afon Tredelerch pan geisiodd tri dyn – un ohonynt â chyllell – ddwyn ei Labrador wyth mlwydd oed.

Gwnaeth wrthsefyll yr unigolion dan amheuaeth – torrodd fag baw ci roedd yn ei gario a ffrwydrodd ei gynnwys dros un o'r dynion a ffodd bob un ohonynt yn waglaw.

Stopiodd aelod o'r cyhoedd i helpu a chysylltodd â Heddlu De Cymru.

Mae'r dioddefwr, a gafodd anafiadau i'w wyneb a chyfergyd, yn gwella'n dda gartref gyda'i ddau gi sydd hefyd yn ddiogel ac yn iach.

Dywedodd Ditectif Gwnstabl Kirsty Matthews: “Roedd y dioddefwr yn ddewr iawn ac mae'n ffodus na chafodd ei anafu'n fwy difrifol wrth iddo wneud popeth o fewn ei allu i atal y dynion rhag mynd â'i gi.

“Rydym yn gwerthfawrogi bod y digwyddiad hwn wedi peri llawer o bryder yn lleol, ar y cyfryngau cymdeithasol, ac yn sicr pob perchennog ci.

“Digwyddiad unigol yw hwn ac mae ymholiadau helaeth yn cael eu cynnal i adnabod rhai sy'n gyfrifol a'u harestio.”

Mae Heddlu De Cymru yn ymwybodol o nifer o bostiadau yn ymwneud ag achosion o ddwyn cŵn, gan gynnwys achosion o gerbydau'n cael eu defnyddio mewn ffordd amheus, i'w gweld ar y cyfryngau cymdeithasol.

Gwyddom y gall postiadau o'r fath beri pryder, ond gallwn sicrhau perchenogion cŵn mai dim ond nifer bach iawn o achosion o gŵn yn cael eu dwyn y mae Heddlu De Cymru wedi cael gwybod amdanynt.

Os byddwch yn adnabod yr unigolion dan amheuaeth o'r lluniau 'e-ffit', neu os bydd gennych unrhyw wybodaeth am y digwyddiad hwn, cysylltwch â ni gan ddyfynnu rhif digwyddiad *066613.

Ewch i: https://bit.ly/SWPReportOnline

Anfonwch neges breifat atom ar Facebook/Twitter

Drwy e-bost: [email protected]

Ffôn: 101

Mewn argyfwng, deialwch 999 bob amser.