Yr heddlu wedi cyhuddo dau ddyn o ymgais i lofruddio ac yn chwilio am drydydd unigolyn dan amheuaeth yn dilyn achos o saethu yn Aberdâr

Mae ditectifs sy'n ymchwilio i achos o saethu i mewn i gyfeiriad yng Nghwm Cynon wedi cyhuddo dau ddyn o ymgais i lofruddio.

Cafodd Oliver Pearce, 30 oed, o Rydyfelin, a Ricky Webber, 28 oed, o'r Porth, eu cyhuddo nos Wener a'u hanfon i'r ddalfa. Roedd disgwyl iddynt ymddangos gerbron Llys Ynadon Caerdydd y bore yma.

Maent wedi'u cyhuddo hefyd o feddu ar arf tanio gyda'r bwriad o beri ofn trais, meddu ar arf gyda'r bwriad o beryglu bywydau, a meddu ar arf mewn man cyhoeddus.

Mae swyddogion yn parhau i ymchwilio i amgylchiadau'r achos, a ddigwyddodd yn Windsor Street, Trecynon, tua 9.30pm nos Lun 1 Chwefror.

Mae ymholiadau'n parhau er mwyn dod o hyd i drydydd unigolyn dan amheuaeth, sef James Drakes, 33 oed, o Bendyrus (yn y llun).

Gofynnir i unrhyw un sy'n gwybod ble mae James Drakes gysylltu â'r heddlu. Mae swyddogion hefyd yn parhau i alw ar unrhyw un sydd â deunydd fideo camera dashfwrdd neu deledu cylch cyfyng o'r ardal, a allai hwyluso'r ymchwiliad, i gysylltu â'r heddlu.

Dywedodd y Ditectif Arolygydd Lianne Rees:

“Rydym yn gwybod bod y digwyddiad hwn wedi peri pryder i drigolion Cwm Cynon, yn arbennig am ei fod yn ymwneud ag arf tanio, sydd, diolch byth, yn anghyffredin iawn yn yr ardal hon.

“Rydym wedi bod yn gweithio'n ddiflino i ddal unrhyw un sy'n gysylltiedig â'r digwyddiad, ac rwy'n gobeithio y bydd y datblygiadau diweddar hyn yn helpu i dawelu meddwl ein cymunedau y byddwn yn cymryd camau cadarn yn erbyn pawb sy'n gysylltiedig â throseddau o'r fath.

“Mae ein hymchwiliad yn parhau ac rydym yn awyddus i siarad â James Drakes ar fyrder. Anogir unrhyw un sy'n credu y gall ein helpu i ddod o hyd iddo i gysylltu â ni ar unwaith.”

Ffoniwch 101, gan ddyfynnu digwyddiad 2100037740. Fel arall, gellir cysylltu â Crimestoppers yn ddienw ar 0800 555111.