Llofruddiaeth ym Mhen-y-lan Dau ddyn wedi cael eu harestio

Mae dau ddyn wedi cael eu harestio mewn cysylltiad â llofruddiaeth Tomasz Waga, 23 oed.

Daeth aelod o'r cyhoedd o hyd i'w gorff am tua 11.30pm nos Iau 28 Ionawr ar Westville Road, Pen-y-lan.

Mae dau ddyn, 29 ac 23 oed, wedi cael eu harestio ar amheuaeth o lofruddiaeth ac maent yn y ddalfa o hyd yng Ngorsaf Heddlu Bae Caerdydd.

Mae archwiliadau fforensig o fflat ar Penlline Road, yr Eglwys Newydd, yn parhau yn dilyn yr arestiad nos Lun.

Mae teulu Tomasz wedi cael y wybodaeth ddiweddaraf, ac yn parhau i gael eu cefnogi gan swyddogion cyswllt â theuluoedd.

Dywedodd y Ditectif Brif Arolygydd Mark O’Shea sy’n arwain yr ymchwiliad:

“Mae'r arestiadau hyn yn dangos datblygiad pwysig yn yr ymchwiliad, ond mae ymholiadau'n parhau i fynd rhagddynt.
“Rydym yn ddiolchgar am yr ymateb gan y cyhoedd hyd yn hyn, ond rydym yn dal yn awyddus i siarad ag unrhyw un a oedd yn ardaloedd Heol Casnewydd a Westville Road neu'n gyrru drwyddynt rhwng 10pm a hanner nos, nos Iau 28 Ionawr.
“Rydyn ni'n gwybod bod Tomasz wedi teithio o ardal Dagenham ddydd Iau i gyfeiriad yn 319 Heol Casnewydd, Caerdydd.
“Credwn fod helynt wedi digwydd am tua 10.30pm yn y lleoliad hwn ac ymosodwyd arno. Mae ymholiadau'n parhau i ganfod sut y cyrhaeddodd Westville Road lle cafodd ei ddarganfod.
“Byddwn yn apelio i unrhyw un a oedd ar Westville Road, Minster Road neu'n agos i 319 Heol Casnewydd rhwng 10pm a hanner nos i gysylltu â'r ystafell ddigwyddiadau, oherwydd gall y darn lleiaf o wybodaeth, waeth pa mor amherthnasol y mae'n ymddangos, fod yn werthfawr i'n hymchwiliad.”

Mae ystafell ddigwyddiadau wedi cael ei sefydlu yng Ngorsaf Heddlu Canol Caerdydd ac mae’r ymchwiliad yn cael ei arwain gan dîm troseddau mawr Heddlu De Cymru.

Dylai unrhyw un sydd â gwybodaeth ffonio 101 neu ddarparu gwybodaeth ar-lein drwy Borth Ymchwiliadau Mawr y Cyhoedd: https://mipp.police.uk/operation/62SWP21B26-PO1.

Fel arall, gallwch ffonio Taclo'r Tacle yn ddienw ar 0800 555 111.