Diweddariad ar yr ymchwiliad i'r llofruddiaeth ym Mhen-y-lan, Caerdydd

Mae ditectifs sy'n ymchwilio i lofruddiaeth ym Mhen-y-lan, Caerdydd wedi enwi'r dyn a fu farw, sef Tomasz Waga, a oedd yn 23 oed.
Daeth aelod o'r cyhoedd o hyd i'w gorff am tua 11.30pm nos Iau (28 Ionawr) ar Westville Road.

Mae ei deulu wedi talu'r deyrnged ganlynol iddo: “Roedd llawer o bobl yn hoff iawn o Tomasz ac mae wedi ein gadael ni'n rhy fuan.

“Mae ei farwolaeth sydyn wedi bod yn ergyd drom i ni a gofynnwn i unrhyw un sydd â gwybodaeth i gysylltu â'r heddlu.

“Bydd yn byw yn ein calonnau am byth a chaiff ei gofio fel y mab, y brawd, y tad a'r partner addfwyn yr oedd.”

Mae ystafell ddigwyddiadau wedi cael ei sefydlu yng Ngorsaf Heddlu Canol Caerdydd ac mae’r ymchwiliad yn cael ei arwain gan dîm troseddau mawr Heddlu De Cymru.

Dywedodd y Ditectif Brif Arolygydd Mark O’Shea sy’n arwain yr ymchwiliad: “Rydyn ni'n gwybod bod Tomasz wedi teithio o ardal Dagenham ddydd Iau i gyfeiriad yn 319 Heol Casnewydd, Caerdydd.

“Credwn fod helynt wedi digwydd am tua 10.30pm yn y lleoliad hwn ac ymosodwyd arno. Mae ymholiadau'n parhau i ganfod sut y cyrhaeddodd Westville Road lle cafodd ei ddarganfod.

“Mae tua 80 o swyddogion a staff yn gweithio ar yr ymchwiliad, ac rydym yn ddiolchgar am yr ymateb gan y cyhoedd hyd yn hyn. Fodd bynnag, rydym yn dal yn awyddus i siarad ag unrhyw un a oedd yn ardaloedd Heol Casnewydd a Westville Road neu'n gyrru drwyddynt rhwng 10pm a hanner nos ddydd Iau (28 Ionawr).

“Byddwn yn apelio i unrhyw un a oedd yn Westville Road, Minster Road neu'n agos i 319 Heol Casnewydd rhwng 10pm a hanner nos i gysylltu â'r ystafell ddigwyddiadau, oherwydd gall y darn lleiaf o wybodaeth fod yn werthfawr i'n hymchwiliad, waeth pa mor amherthnasol y mae'n ymddangos.

“Rydym hefyd yn awyddus i siarad ag unrhyw rai o ffrindiau neu gydnabod Tomasz yn Llundain ac Essex a allai ein helpu i greu darlun o'i fywyd.

“Rwyf wedi cyfarfod â theulu Tomasz ac mae’n amlwg bod ei farwolaeth wedi cael effaith ofnadwy arnynt, ac maent yn cael eu cefnogi gan Swyddogion Cyswllt Teuluol ar hyn o bryd.”

 

Nid arestiwyd neb mewn cysylltiad â'r digwyddiad hwn ac nid yw'n cael ei gysylltu â'r lladrad na'r ymgais i ladrata ym Mhen-y-lan ar 27 ac 28 Ionawr.

Dylai unrhyw un sydd â gwybodaeth ffonio 101 neu ddarparu gwybodaeth ar-lein drwy Borth Ymchwiliadau Mawr y Cyhoedd https://mipp.police.uk/operation/62SWP21B26-PO1. Fel arall, gallwch ffonio Taclo'r Tacle yn ddienw ar 0800 555 111.