Cyllid Corfforaethol

Treuliwyd fy more yn ateb ymholiadau Swyddfa Archwilio Cymru gan fod ein Datganiad o Gyfrifon blynyddol yn cael ei archwilio ar hyn o bryd ac mae llawer o ymholiadau i archwilwyr eu hateb er mwyn iddynt allu rhoi sicrwydd bod yr Heddlu wedi rheoli ei faterion ariannol yn effeithiol yn ystod y flwyddyn.

Defnyddiais y gampfa ar y safle amser cinio oherwydd rwy'n hoffi cadw'n heini.

Cynhaliais Adolygiad Datblygiad Personol gydag aelod o'r tîm ar ddechrau'r prynhawn. Mae'n hyfforddi i fod yn gyfrifydd cymwys a noddir gan yr heddlu dan gytundeb hyfforddiant.

Treuliwyd ail hanner y prynhawn mewn cyfarfod gyda'n cynghorwyr treth. Mae fy nhîm yn cwblhau'r ffurflenni TAW misol ac weithiau, ceir materion TAW cymhleth yn ymwneud â rhai o'n prosiectau Gwariant Cyfalaf mwy o faint. Mae'n bwysig cael y driniaeth gyfrifyddu yn gywir er mwyn i ni wneud y gorau o'n cyllidebau.

Treuliais y bore yn gweithio ar y dyfarniad cyflog diweddar a gynigiwyd i gydweithwyr. Mae'n bwysig y caiff cyflogau pawb eu diweddaru i adlewyrchu'r cynnydd hwn er mwyn iddynt gael eu talu'n gywir.

Gwnes i fwyta fy nghinio gyda'm cymydog am ein bod yn ffrindiau da ac mae'r ddau ohonom yn gweithio gartref tua 70% o'r amser. Mae'r Heddlu yn gyflogwr hyblyg ac mae llawer o aelodau o staff yr Adran Gyllid yn gallu gweithio gartref ond maent yn mynd i'r swyddfa ar ddiwrnodau penodol i gysylltu â'u cydweithwyr.

Ar ddechrau'r prynhawn, cawsom ein cyfarfod tîm wythnosol gan ddefnyddio MS Teams/fideogynadledda. Dyma lle rydym yn llunio'r cynllun gwaith ar gyfer yr wythnos gyda'n rheolwr. Yr wythnos hon yw'r ychydig ddyddiau olaf ar gyfer dyddiad cau'r gyflogres felly bydd rhaid gwirio'n drwyadl i wneud yn siŵr bod yr holl dreuliau a hawliadau goramser yn gywir a bod yr holl ddechreuwyr newydd ac ymadawyr ar gyfer y mis wedi'u prosesu'n gywir.

Treuliwyd rhan olaf y diwrnod mewn cyfarfod gyda chyflenwyr allanol sy'n ein helpu ni i wneud rhai newidiadau hanfodol i feddalwedd y gyflogres sy'n gysylltiedig â chynlluniau aberthu cyflog.

Rydym yn gweithio ar brosiect mawr o'r enw Pensions Remedy ar hyn o bryd. Mae a wnelo â chywiro camgymeriad gan Lywodraeth y DU gyda rhai newidiadau a wnaed i Reoliadau Pensiwn yr Heddlu yn 2015. Treuliais y bore yn edrych ar gronfa ddata i sicrhau bod meysydd fel hyd gwasanaeth, hanes cyflogau ac ati yn gywir cyn i ffeil y gronfa ddata gael ei hanfon at ein gweinyddydd pensiynau allanol.

Treuliais ddechrau’r prynhawn yn helpu tîm y gyflogres. Mae pob un ohonom yn cydweithio ar ddiwedd y mis i sicrhau y caiff dyddiadau cau hollbwysig eu cyflawni.

Tuag at ddiwedd y diwrnod, ymunais mewn cyfarfod â'r Cyfarwyddwr Cynorthwyol Cyllid a gweddill y tîm pensiynau. Gan fod pensiynau wedi mynd yn gymhleth iawn dros y 5 mlynedd diwethaf, rydym yn dal i fyny gyda'r Cyfarwyddwr Cynorthwyol Cyllid yn fisol er mwyn i'r holl waith cysylltiedig â phensiynau gael ei gynllunio'n briodol a bod canlyniadau ariannol y gwaith hwnnw'n cael eu nodi gan yr Heddlu fel rhan o'i drefniadau cynllunio ariannol.