Cyfathrebu Corfforaethol

Y tîm digidol yw'r man cyntaf ar gyfer popeth sy'n gysylltiedig â dyluniadau digidol, y cyfryngau gweledol, y cyfryngau cymdeithasol a gwefan yr heddlu. Yn hynny o beth, caiff ein diwrnodau eu llywio gan ddigwyddiadau a galw, ac er ei fod yn ystrydeb, mae pob diwrnod yn wahanol. 

Er ein bod ni'n aml yn gweithio yn y swyddfa neu yn y cartref, mae natur ein gwaith yn golygu hefyd ein bod ni allan ar hyd y lle yn aml, yn cyfarfod â phobl ym mhob rhan o'r heddlu yr ydym am adrodd eu straeon, yr ydym yn gweithio gyda nhw ar brosiect i rannu cyngor ar atal troseddau, neu yr ydym yn eu digwyddiadau yn tynnu lluniau, yn ffilmio fideos ac yn caffael cynnwys arall i'r cyfryngau cymdeithasol.

Ar ddiwrnod nodweddiadol yn y swyddfa, byddem yn treulio amser i ddechrau yn trefnu ein cynnwys cyfryngau cymdeithasol ar gyfer y diwrnod ac ar gyfer yr wythnos i ddod. Rydym am sicrhau ei fod yn gymysgedd o straeon o'r llys, cyngor ar atal troseddau, diweddariadau ar ymgyrchoedd, newyddion da ac ymgysylltu â'r cyhoedd, yn ogystal â chipolwg y tu ôl i'r llenni i ddangos sut mae plismona'n gweithio a beth sy'n rhoi boddhad i'n cydweithwyr. Mae gennym strategaeth gynhwysfawr ar gyfer ein dull gweithredu ar y llwyfannau cyfryngau cymdeithasol amrywiol, ac ar ôl i hon gael ei mapio am y diwrnod, rydym yn parhau i chwilio am gynnwys pellach, wrth i ni bostio'r cynnwys hwnnw sydd eisoes wedi'i gynllunio – gan gynnwys hefyd yr angen i sicrhau bod popeth, o bostiadau Facebook i isdeitlau fideo - yn Gymraeg ac yn Saesneg.

Wrth gwrs, mae natur ein gwaith yn golygu bod rhaid i ni hefyd fod yn ymatebol. Gallai hyn olygu sicrhau ein bod ni'n neidio ar y duedd ddiweddaraf yn y cyfryngau cymdeithasol, yn ailystyried ein cynlluniau pan fydd stori newydd yn torri, neu'n rheoli ac yn ymdrin â chyfathrebiadau mewn argyfwng, y mae cyfran fawr ohonynt yn amlygu eu hunain ar y cyfryngau cymdeithasol gyntaf y dyddiau hyn.

Ar ddiwrnod nodweddiadol – ar ôl mapio cynlluniau cymdeithasol a chynlluniau cyfathrebu eraill, ynghyd â sesiynau dal i fyny gyda'r tîm, er mwyn i bawb wybod beth sydd ar y gweill a phwy sy'n gwneud beth – gallem fod wedi cyrraedd canol y bore. Yn ogystal â phostio ar y cyfryngau cymdeithasol, ein nod yw bod y sgyrsiau ar ein sianeli yn rhai dwy ffordd, ac felly rydym yn delio â phob un sylw ar Facebook neu drydariad (post ar ‘X’) drwy ein llwyfan rheoli ar y cyfryngau cymdeithasol, gan edrych yn y mewnflwch bob hyn a hyn drwy gydol y dydd er mwyn monitro naws sgyrsiau, ymateb lle y bo'n briodol – ac os oes angen, amddiffyn y sefydliad, rhoi mwy o gyd-destun neu esboniad er mwyn tawelu unrhyw glecs, neu fel cyfle i ymgysylltu mewn ffordd fwy cadarnhaol. Rhaid wrth ymatebion amserol a chadarn, ac felly rydym yn cadw llygad barcud ar y mewnflwch drwy gydol y dydd.

Rydym hefyd yn awyddus, unwaith eto lle y bo'n briodol, i ddefnyddio ychydig o hiwmor neu hyd yn oed feiddgarwch er mwyn pwysleisio i'r cyhoedd fod y sefydliad yn cynnwys pobl go iawn sy'n gwneud gwaith da, yn ogystal â dangos i'r staff ein bod ni'n eu cefnogi nhw.

Fel ‘porthgeidwaid digidol’ ar gyfer yr adran, rydym hefyd yn cymryd amser i ddadansoddi sut mae ein hallbwn wedi'i dderbyn, beth sydd wedi mynd yn dda a beth y gall fod angen ei wella. Unwaith eto, byddwn yn defnyddio ein llwyfan rheoli ar y cyfryngau cymdeithasol, yn ogystal â'n llwyfannau digidol mewn ffordd gynhenid, er mwyn cadw llygad ar ystadegau, ond hefyd ar ein greddf ein hunain. Yn yr un modd, ni yw'r man cyswllt cyntaf ar gyfer gwaith ar ein gwefan, fel cadw'r olwg a'r teimlad yn ffres, gwneud diweddariadau a delio â rhai o'r materion technegol a all effeithio arni, o ddolenni toredig i ddogfennau PDF na ellir eu hagor i wallau sillafu.

Er mai ‘porthgeidwaid digidol’ yw ein rôl, mae'n bwysig ein bod ni'n cysylltu â thimau eraill yn yr adran cysylltiadau i sicrhau bod ein gwaith yn cydweddu i'w gilydd. Er enghraifft, mae ein cydweithwyr dylunio digidol a chyfryngau gweledol yn darparu'r asedau cyfathrebu atyniadol hynny a all helpu i ddod â chyngor ar atal troseddau yn fyw neu i ddangos sut mae gorymdaith cwblhau hyfforddiant y swyddogion diweddaraf wedi mynd. 

Yn yr un modd, mae straeon dedfrydu yn y llys yn aml yn digwydd yn y prynhawn, ac er bod hyn yn rhywbeth a fyddai'n cael ei arwain gan dîm y wasg fel rheol, rydym wrth law i sicrhau yr ymdrinnir â hyn yn briodol ar y cyfryngau cymdeithasol.  Mae hynny'n cynnwys materion technoleg (e.e. mecaneg postio pethau fel fideos, neu ddiffodd sylwadau), materion safoni (parhau i fonitro sylwadau ac ymatebion eraill ar y cyfryngau cymdeithasol), a chyfleoedd ymgysylltu (sut orau i ‘werthu’ y stori, cyrraedd y gynulleidfa ehangaf posibl ac ymgysylltu â'n cynulleidfaoedd ar-lein yn y ffordd fwyaf priodol).

Er y byddai diwrnod nodweddiadol fel arfer rhwng 9am a 5pm, mae gennym hyblygrwydd rhag ofn y bydd digwyddiadau y tu allan i'r adegau hynny y byddwn am eu cynnwys. Ond hyd yn oed mewn diwrnod gydag oriau arferol, os mai chi sydd ar alwad i gyflenwi am waith digidol, ni fydd eich diwrnod drosodd eto. Gan weithio ochr yn ochr â swyddog y wasg ar alwad, bydd y swyddog cyfathrebu ar-lein digidol yn parhau i fonitro mewnflwch y cyfryngau cymdeithasol ar gyfer ein cyfrifon Facebook, X/Twitter, Instagram a TikTok – unwaith eto er mwyn sicrhau safoni cywir, tynnu sylw at unrhyw faterion sy'n codi ar y cyfyngau cymdeithasol y mae angen i ni fod yn ymwybodol ohonynt, a manteisio ar y cyfle i ymgysylltu'n gadarnhaol â chyfleoedd a all gyflwyno eu hunain y tu allan i oriau.

Mae'r shifft honno'n gorffen am tua 9pm fel arfer, a bryd hynny - ar wahân i unrhyw ddigwyddiadau arwyddocaol sy'n gallu digwydd unrhyw amser, o gofio natur plismona - mae eich diwrnod ar ben... cyn i'r cyfan ddechrau unwaith eto am 7am y diwrnod wedyn i bwy bynnag sydd nesaf ar y shifft ddigidol ar alwad, cyn i'w cydweithwyr ymuno â nhw eto erbyn tua 9am am ddiwrnod prysur arall.

Mae pob diwrnod yn wahanol fel rhan o'r tîm Newyddion. Rydym yn bennaf cyfrifol am ateb ymholiadau'r cyfryngau, y ceir llu ohonynt gan ganolfannau lleol a chenedlaethol y cyfryngau. Rydym hefyd yn gweithredu fel cymorth gweithredol i swyddogion sydd am apelio am wybodaeth ar gyfer digwyddiadau difrifol, boed hynny'n wrthdrawiad traffig ffyrdd, yn ymosodiad, neu'n apêl am unigolyn y mae'r heddlu'n awyddus i'w ganfod neu unigolyn coll. Gan fod grym y cyfryngau cymdeithasol yn helpu mewn ffordd ddramatig i gael gwybodaeth gan y cyhoedd i helpu gydag ymchwiliadau, rydym yn cael ceisiadau mynych gan swyddogion i bostio apêl. Yn aml, ni yw'r man cyswllt cyntaf oherwydd effeithiolrwydd ein hapeliadau a'n nifer mawr o ddilynwyr ar y cyfryngau cymdeithasol, a hynny ar bob sianel.

Rydym hefyd yn cyhoeddi straeon dedfrydau llys cadarnhaol a rhagweithiol er mwyn helpu i fagu hyder y cyhoedd mewn plismona sydd wedi bod yn broblem yn ystod y blynyddoedd diwethaf. Mae cyhoeddi'r straeon hyn hefyd yn dangos yr amrywiaeth eang o achosion y mae ein swyddogion yn ymdrin â nhw, gan dynnu sylw at adrannau gwahanol a thimau ymchwiliol. Dyma ein cyfle i ddangos gwaith cadarnhaol Heddlu De Cymru ac i dynnu sylw at y straeon newyddion da a gall euogfarnau troseddwyr fod yn un o rannau mwyaf gwerth chweil y rôl.

Fodd bynnag, y prif alw arnom, fel y gwnaethom sôn amdano, yw ymateb i ymholiadau'r cyfryngau. Boed hynny'n golygu rhoi sylwadau ar ddigwyddiad byw parhaus, ceisiadau i ffilmio ein swyddogion, neu geisiadau am gyfweliadau, gall y cyfryngau fod yn eithaf taer wrth ofyn am unrhyw un o'r rhain. Daw hyn i'r amlwg yn fwy pan fydd yr heddlu yng nghanol digwyddiad mawr sy'n cael sylw yn y cyfryngau cenedlaethol. Gall yr angen i ddarparu diweddariadau amserol, cywir a chryno fod yn heriol ond mae'n hanfodol er mwyn helpu i fowldio'r sylw. Mae gofynion cyfryngau 24 awr, y broses o ledu clecs ac ymateb di-oed y cyfryngau cymdeithasol wedi cynyddu pwysigrwydd ein rôl yn sylweddol. Dyma hefyd pam rydym yn trefnu dyletswyddau ar alwad 24 awr drwy'r nos a'r penwythnos er mwyn ymateb i unrhyw ddigwyddiad mawr neu frys.

Felly, mae diwrnod nodweddiadol yn cynnwys paratoi/cyhoeddi straeon o'r llys, monitro sylw yn y cyfryngau/cyfryngau cymdeithasol, ymateb i ymholiadau'r cyfryngau a helpu yn weithredol gydag apeliadau ym mhob rhan o'r heddlu.

Rôl y Tîm Cyfathrebu Mewnol yw rhannu gwybodaeth yn effeithiol gyda swyddogion yr heddlu, staff a gwirfoddolwyr er mwyn iddynt ddeall bwriad, gweledigaeth a gwerthoedd y sefydliad, ynghyd â'r blaenoriaethau presennol, a gallu cyflawni eu gwaith yn dda a meithrin diwylliant cadarnhaol.

Un o hanfodion gweithio i un o'r gwasanaethau brys yw y gellir galw arnom i gynhyrchu cynnwys ymatebol ar fyr rybudd, ond gan mwyaf, mae ein cyfathrebiadau mewnol yn rhagweithiol ac yn cwmpasu ystod eang o bynciau, o ddiweddariadau gweithredol i newid trefniadol i gymorth llesiant i gydweithwyr.

Mae rôl swyddog cyfathrebu mewnol yn amrywiol, ac mae pob diwrnod yn wahanol. Mae gwaith y tîm yn gyfnewidiol ac rydym yn helpu ac yn cefnogi ein gilydd yn rheolaidd gyda phrosiectau neu ddarnau o waith.

Rydym yn cyhoeddi ac yn monitro cynnwys drwy nifer o sianeli cyfathrebu yn y tîm mewnol, gan gynnwys mewnrwyd yr heddlu ‘BOB’, cyfathrebu drwy e-bost yr heddlu, ein tudalen breifat ar Facebook i Dîm HDC, sgriniau digidol a'r cylchgrawn chwarterol mwy traddodiadol ‘Billboard’.

Yn allweddol i'r rôl mae datblygu ein cynnwys diddorol, felly yn ogystal ag ysgrifennu erthyglau, gallem hefyd fod yn drafftio sgriptiau i brif swyddogion, ffilmio darnau byr i'r camera a golygu deunydd fideo a chynhyrchu graffigau ac animeiddiadau syml.

Yn ogystal â'r baich gwaith unigol, mae pob aelod o'r tîm yn cymryd ei dro i fonitro'r mewnflwch e-bost cyfathrebu. Mae'r rôl hon a adwaenir fel ‘swyddog dyletswydd’ yn rhan greiddiol o gylch gwaith y tîm a chaiff y blwch ei fonitro a'i weithredu'n ddyddiol rhwng 9 a 5 o'r gloch.

Disgwylir i'r ‘Swyddog Dyletswydd’ dderbyn a chadw perchnogaeth o unrhyw beth sy'n cyrraedd y mewnflwch. Gellir ymdrin â rhai negeseuon e-bost yn gyflym iawn, tra gall eraill ofyn am gymorth cyfathrebu gyda phrosiect mawr, a allai olygu cyfnod hir o amser.

Mae'r cyfrifoldebau eraill yn cynnwys cynnal a monitro ein Mewnrwyd ‘BOB’, a all amrywio o gyhoeddi erthyglau/cyhoeddiadau, cymeradwyo mân hysbysebion, safoni sylwadau gan gydweithwyr ac ymdrin â materion cyffredinol y gall defnyddwyr gael profiad ohonynt ar y llwyfan. 

Yn ogystal â'r tasgau dyddiol, mae'r tîm yn cyfrannu at ‘Archebion Wythnosol’, sef neges e-bost i bawb yn yr heddlu sy'n cael ei choladu a'i chyhoeddi'n uniongyrchol gan y tîm bob dydd Mercher ac sy'n cynnwys crynodeb o'r diweddariadau pwysicaf gan yr heddlu dros y saith niwrnod diwethaf.

Mae'r tîm hefyd yn goruchwylio'r grŵp Facebook preifat ar gyfer Tîm HDC, sef llwyfan cyfathrebu mwy anffurfiol. Mae hyn yn golygu rheoli aelodaeth y grŵp a monitro'r postiadau ynghyd â chyhoeddi cynnwys. Yn ogystal, rydym yn rheoli'r cynnwys ar nifer o sgriniau digidol sydd yn y lleoliadau gorau posibl ym mhob rhan o'n hystâd. Mae'r rhain yn adnoddau gweledol grymus iawn sy'n cael eu defnyddio'n aml i rannu negeseuon allweddol. Gallem hefyd ddefnyddio dulliau mwy traddodiadol o gyfathrebu yn achlysurol, fel posteri yn y lleoliadau gorau posibl.

Gallem hefyd gefnogi adrannau fel Gwasanaethau Corfforaethol a chyrff cenedlaethol i gael adborth a gwybodaeth gan ein gweithlu, helpu gyda gweithgareddau ymgysylltu fel arolygon, a meddu ar rôl wrth gefnogi ystod eang o ddigwyddiadau a gynhaliwyd neu a gefnogwyd gan HDC.

Yn ogystal, er mwyn cyhoeddi ar ein sianeli cyfathrebu, ein cyfrifoldeb ni hefyd yw cynnal a datblygu'r sianeli hyn. Mae'r rôl hon yn amrywiol, weithiau'n feichus ond yn gyffrous bob amser.

Mae gan Ganolfan Treftadaeth ein heddlu dîm bach ond amlswyddogaethol gydag allbwn eang ei ystod sy'n cwmpasu cysylltiadau mewnol a chysylltiadau gwefan, cysylltiadau digidol a chreu cynnwys, ymchwil, rheoli casgliadau ac, wrth gwrs, ymgysylltu â'r gymuned.

Prin y mae'r tîm yn gweithio gartref ac nid ydynt byth yn rhy bell o'r Ganolfan Treftadaeth, sydd ym mhencadlys yr Heddlu ym Mhen-y-bont ar Ogwr. Os nad ydynt yn ymgysylltu â chymunedau yn y Ganolfan neu'n gweithio gyda chydweithwyr yn y swyddfa Cysylltiadau, mae bron yn sicr y byddant rywle ar ystâd y pencadlys, yn cyfarfod â chydweithwyr o adrannau eraill y maent yn gweithio gyda nhw ar brosiectau amrywiol neu ar ffrydiau gwaith parhaus y maent yn rhan ohonynt. O gofio natur eu gwaith, gellir hefyd dod o hyd i aelodau o'r tîm mewn canolfannau ymchwil fel Archifau Morgannwg neu Orllewin Morgannwg yng Nghaerdydd ac Abertawe.

Er ei fod yn ystrydeb(!), mae pob diwrnod yn wahanol i'n tîm Treftadaeth. Ar ddiwrnod arferol a phan fo'n bosibl, bydd aelodau o'r tîm yn cyfathrebu i drafod ymweliadau sydd i ddod i'r Ganolfan Treftadaeth a phrosiectau a ffrydiau gwaith parhaus sy'n eu helpu i drosglwyddo treftadaeth yr heddlu i gydweithwyr, cymunedau neu'r ddau. Yn dibynnu ar y prosiect sydd ar waith, gallai aelodau o'r tîm fod yn paratoi cynnwys i gynulleidfaoedd mewnol, y cyfryngau cymdeithasol neu'n cyfrannu at ymchwil a deunydd sylfaenol gwerthfawr tuag at ymgyrchoedd neu brosiectau sydd â negeseuon hanesyddol. Wrth baratoi cynnwys, mae'n hanfodol bod ein tîm yn ymgynghori â chydweithwyr o swyddogaethau gwahanol yn yr adran Cysylltiadau. Gyda nhw, gallwn brawfddarllen ein deunydd ac amserlennu'r cynnwys yn unol â chalendrau'r adrannau.

Ar ddiwrnod gwaith nodweddiadol, caiff ceisiadau i ymweld â'r Ganolfan Treftadaeth gan gydweithwyr, cymunedau, ysgolion, grwpiau ieuenctid a grwpiau dysgwyr sy'n oedolion, i enwi dim ond rhai ohonynt, eu bwydo i fewnflwch a rennir ymhlith y tîm.  Yn dibynnu ar bwy sy'n ymweld – ac ar ôl gwneud y trefniadau angenrheidiol ar gyfer pwy fydd yn hwyluso – bydd y tîm yn paratoi'r Ganolfan mewn ffordd briodol. Er enghraifft, os oes disgwyl iddynt gynnal sesiwn i grŵp ysgol, byddant yn paratoi sawl ymgysylltiad uniongyrchol a gweithgareddau fforensig hwyliog i wneud y profiad yn un mor hwyliog a chyfranogol â phosibl. Ar y llaw arall, os oes disgwyl iddynt groesawu grŵp hanes lleol, byddant yn teilwra'r ymweliad o amgylch ei anghenion, gan gynnig sgwrs hanesyddol ynghyd â'r daith dywys arferol o amgylch y Ganolfan Dreftadaeth. Mae'r tîm yn cynnig dau slot i ymwelwyr ddod i'r Ganolfan Treftadaeth bob dydd, un am 10am ac un am 2pm, bum niwrnod yr wythnos. Fel rheol, mae'r ymweliadau'n cymryd oddeutu 90 munud, ond gall yr oriau hyn amrywio yn dibynnu ar y grŵp.

Ar ochr arall y geiniog ac o fewn y diwrnod gwaith nodweddiadol o hyd, mae aelodau o'r tîm hefyd yn cymryd rhan yn aml mewn prosiectau gydag adrannau eraill ym mhob rhan o'r heddlu a hyd yn oed gyda heddluoedd ledled y wlad. Fel porthgeidwaid hanes yr heddlu, mae'r tîm yn gweithio'n aml gydag adrannau eraill i ymgymryd â gwaith ymchwil a chyfrannu gwybodaeth a deunyddiau tuag at ymgyrchoedd ymwybyddiaeth. Er enghraifft, mae eu ffrwd waith barhaus gyda'r Tîm Cydraddoldeb, Amrywiaeth a Chynhwysiant yn cynnwys llunio llinell amser sy'n canolbwyntio ar hil ym maes plismona. O fewn y ffrwd waith hon, mae'r tîm wrthi'n ymchwilio i gynnwys ac yn ei ysgrifennu o fewn y llinell amser a gan gysylltu ag aelodau'r tîm Cydraddoldeb, Amrywiaeth a Chynhwysiant ar bwyntiau cyffwrdd y llinell amser. Daw enghraifft arall o'r gwaith a wnânt fel cynrychiolwyr yr heddlu ym Mhortffolio Cyngor Cenedlaethol Prif Swyddogion yr Heddlu ar gyfer Treftadaeth. O fewn y gweithgor hwn, mae aelodau o'r tîm wrthi'n darparu gwybodaeth, ystadegau ac astudiaethau achos sy'n dangos allgymorth Treftadaeth o safbwynt Heddlu De Cymru. Mae'r wybodaeth hon yn cael ei hadrodd yn ôl i arweinwyr Portffolio ar hyn o bryd er mwyn ei hystyried fel rhan o brif bapur y Cyngor ynghylch effaith treftadaeth yr heddlu ar raddfa genedlaethol.

Fel rheol, mae diwrnod gwaith y tîm yn gorffen tua 5pm – ond gall hyn fod yn hyblyg weithiau, mewn perthynas â phan fydd aelodau o'r tîm yn croesawu ymwelwyr i'r Ganolfan Treftadaeth neu pan fyddant yn mynychu digwyddiadau a diwrnodau agored ledled ardal ein heddlu.

Mae'r tîm marchnata ac ymgyrchoedd yn gyfrifol am reoli'r brand, datblygu strategaethau ac ymgyrchoedd marchnata ar gyfer meysydd penodol o'r busnes a chyfathrebu mewn modd sy'n sefyll allan drwy ddefnyddio cysylltiadau cymdeithasol, digidol a chyfryngau.

Rydym yn rhannu ein hamser rhwng gweithio gartref a gweithio yn y swyddfa, sydd wedi'i lleoli ym Mhencadlys yr Heddlu ym Mhen-y-bont ar Ogwr gyda'r timau cyfathrebu eraill. Rydym hefyd yn hoff o gwrdd mewn caffis a siopau coffi i daflu syniadau dros ginio - gall gwahanol leoedd roi syniadau newydd i ni a'n galluogi i fod yn greadigol.

Yn ystod y cyfnod cyn lansio'r ymgyrch, mae'n siŵr y byddwn o gwmpas y lle sawl gwaiath yr wythnos neu hyd yn oed sawl gwaith y dydd yn casglu cynnwys. Mae hynny'n cynnwys ffotograffiaeth, fideograffi, clipiau sain neu gyfweld ag arbenigwr ar y pwnc.

Ar ddiwrnod arferol, byddem yn dechrau drwy ymchwilio i bynciau a chynulleidfaoedd i lywio ein hymgyrchoedd. Mae'r ymgyrchoedd rydym yn eu cynnal yn dibynnu ar geisiadau gan swyddogion a staff a'r hyn sy'n digwydd yn lleol ac yn genedlaethol. Golyga hyn bod ein prosiectau'n cwmpasu amrywiaeth o bynciau o drais yn erbyn menywod a merched i droseddau casineb, yfed a gyrru a throseddau'n ymwneud â chyllyll i recriwtio a phopeth arall.

Mae llawer o gynllunio a pharatoi yn mynd i mewn i'n gwaith ac mewn diwrnod arferol, byddem yn ysgrifennu cynlluniau ymgyrchoedd a strategaethau marchnata, yn cwrdd ag arweinwyr yr heddlu a swyddogion i drafod eu pynciau arbenigol, yn creu cynnwys diddorol ar gyfer y cyfryngau cymdeithasol, yn golygu fideos, yn trefnu cyfieithiadau (mae ein holl waith yn ddwyieithog), yn cyfweld â llefaryddion gan gynnwys gweithwyr proffesiynol, dioddefwyr a chyflawnwyr troseddau yn ogystal ag adrodd straeon newyddion a rhannu syniadau â newyddiadurwyr a dylanwadwyr.

Pe byddem wrthi'n cynnal ymgyrch, byddai ein diwrnod yn edrych ychydig yn wahanol. Yn ogystal â'r cyfrifoldebau arferol o ddydd i ddydd wrth gynllunio ymgyrchoedd, byddem yn sicrhau bod gennym afael dda ar yr ymgyrchoedd byw. Byddai'r tîm yn dadansoddi data ar ein cynnwys ac yn gweld beth sy'n gweithio a beth nad yw'n gweithio, yn gwneud newidiadau, yn rhoi'r wybodaeth ddiweddar i swyddogion perthnasol a staff am hynt y gweithgarwch, ac yn paratoi ar gyfer y gwerthusiad.

Er bod llawer o gynllunio yn mynd i'n hymgyrchoedd, mae natur ein gwaith yn golygu bod rhaid i ni hefyd fod yn ymatebol. Gall hyn olygu sicrhau ein bod yn dilyn y tueddiadau diweddaraf ac yn creu cynnwys newydd neu'n ailystyried ein cynlluniau pe bai stori newyddion berthnasol yn torri, neu un sy'n torri ar y cyfryngau cymdeithasol.

Er mwyn bod yn rhan o'r tîm hwn, mae chwarae rhan flaenllaw o ran tueddiadau cysylltiadau cyhoeddus a newyddion y diwydiant yn hanfodol er mwyn sicrhau bod ein deunydd cyfathrebu yn dal sylw. Rydym yn aml yn edrych am yr ymgyrchoedd a'r gwaith marchnata gorau er mwyn creu syniadau sy'n seiliedig ar ddealltwriaeth o'r diwydiant. Rydym yn hoff o sicrhau bod y cymunedau rydym am eu cyrraedd yn defnyddio'r dulliau cyfathrebu rydym yn eu cynllunio ac mae llawer o ymchwil yn mynd i mewn i sicrhau hyn!