Canllawiau ar ymgeisio ar gyfer staff yr heddlu

Bydd y cam hwn yn gofyn am eich manylion personol, eich manylion cyswllt a'ch rhif yswiriant gwladol. Yna, byddwn yn gofyn cwestiynau am eich cymhwysedd ar gyfer y swydd. Gall hyn statws preswylio, ymlyniad gwleidyddol, statws ariannol a gwybodaeth am unrhyw rybuddion ac euogfarnau. Gall y cwestiynau a ofynnir fel rhan o'r adran hon amrywio o ffurflen i ffurflen yn dibynnu ar ba rôl rydych yn gwneud cais amdani a'r gofynion cymhwysedd ar gyfer y rôl honno. Er enghraifft, efallai y bydd rhai rolau hefyd yn ceisio gwybodaeth am eich gallu i yrru, unrhyw datŵs sydd gennych neu a ydych erioed wedi bod yn aelod o'r lluoedd arfog.

Gellir rhannu Adran 2 ffurflen gais Staff yr Heddlu yn dair rhan:

Rhan A - Gwybodaeth am eich cymhwysedd ar gyfer fetio diogelwch. Bydd hefyd yn gofyn a oes gennych anabledd: mae hyn er mwyn i ni allu cysylltu â chi ynghylch addasiadau rhesymol.

Rhan B - Gwybodaeth bresennol a blaenorol am eich cyflogaeth, eich cyfeiriadau, eich addysg, unrhyw fuddiannau busnes a'ch sgiliau iaith.

Rhan C - Asesiad ar sail cymhwysedd. Dyma'r rhan o'ch ffurflen gais a ddefnyddir yn ystod y broses o lunio rhestr fer. Mae'n bwysig bod yr holl wybodaeth berthnasol rydych am gael eich asesu yn ei herbyn hefyd yn cael ei chynnwys, hyd yn oed os caiff ei chrybwyll rywle arall yn eich cais. Er enghraifft, os gofynnir i chi ddangos tystiolaeth o gymwysterau penodol fel TGAU, dylid eu rhestru hefyd yn yr ardal asesu hon, nid dim ond yn yr adran addysg yn Rhan B.

• Cofiwch wneud yn siwr fod eich CV yn cynnwys y wybodaeth ddiweddaraf am eich rolau a'ch cyfrifoldebau mwyaf diweddar.
• Tynnwch sylw at eich profiad o bob rôl, nodwch eich cyflawniadau mewn pwyntiau bwled. Peidiwch â rhestru eich dyletswyddau yn unig, ond rhowch dystiolaeth ar ffurf cyflawniadau.
• Rhestrwch eich addysg, gan gynnwys tystysgrifau ac aelodaeth.
• Personolwch eich CV ar gyfer y rôl rydych yn gwneud cais amdani, gan gynnwys geiriau allweddol sydd wedi'u cynnwys yn y proffil rôl a thynnwch sylw at y rhai sydd fwyaf perthnasol ar gyfer y rôl.
• Cadwch y CV yn gryno, gan gynnwys y wybodaeth bwysicaf a mwyaf perthnasol yn unig.

• Rydych wedi cwmpasu eich profiadau ar eich CV, felly mae'r datganiad personol yn gyfle i chi roi gwybod i ni pam eich bod yn teimlo bod y rôl hon yn addas i chi.
• Defnyddiwch y proffil rôl i gyflwyno tystiolaeth ychwanegol ar y sgiliau a'r cymwyseddau gofynnol.
• Cofiwch gynnwys enghreifftiau perthnasol o'r gwaith rydych wedi ymgymryd ag ef.
• Rhowch wybod i ni pam yr hoffech weithio i Heddlu De Cymru.
• Rhowch wybod i ni am eich gwerthoedd sut maent yn cyd-fynd â gweithio gyda ni.
• Ailddarllenwch eich CV a'ch datganiad personol er mwyn gwirio'r sillafu, y gramadeg a'r fformatio cyn ei gyflwyno.

Bydd proffil sy'n gysylltiedig â'r swydd rydych yn gwneud cais amdani wedi'i atodi i'r hysbyseb. Diben y proffil hwn yw rhoi trosolwg o'r rôl a'r meini prawf y bydd angen i chi allu eu bodloni er mwyn gwneud y gwaith. Dylech ddefnyddio Proffil y Rôl i gwblhau rhan asesu'r ffurflen gais.

 

Mae proffil y rôl yn manylu ar y prif gyfrifoldebau a'r meini prawf sy'n ofynnol ar gyfer y rôl. Wrth ddangos tystiolaeth o'ch sgiliau, eich gwybodaeth, eich profiad a'ch rhinweddau personol fel y'u hamlinellir ym meini prawf proffil y rôl, efallai yr hoffech ystyried y prif gyfrifoldebau a pha gymwyseddau / rhinweddau sydd gennych i fodloni'r cyfrifoldebau hyn.

Cymhwysedd yw rhinwedd a ddefnyddir i fesur pa mor dda y gallwch wneud rhywbeth: gall cymwyseddau gynnwys meysydd megis, ‘cynnal safonau proffesiynol’ neu ‘peidio â chynhyrfu ac aros yn broffesiynol dan bwysau’. Os gallwch ddangos tystiolaeth yn eich cais o adeg pan rydych wedi llwyddo i gynnal safonau proffesiynol neu beidio â chynhyrfu dan bwysau, byddwch yn dangos eich bod yn ‘gymwys’ yn y meysydd hyn. Rhaid i chi ddangos tystiolaeth o'r rhinweddau sydd gennych eisoes, neu y gallech eu datblygu, sy'n eich galluogi i gyflawni'r rôl. Defnyddir eich atebion yn yr adran hon i benderfynu a fydd eich cais yn symud ymlaen i'r cam nesaf. Mae'n bwysig eich bod yn meddwl yn ofalus am eich ymatebion, a all fod yn seiliedig ar brofiadau diweddar neu o'r gorffennol.

 

Mae proffil pob rôl rydym yn ei hysbysebu yn nodi'n glir restr gyflawn o gymwyseddau sy'n ofynnol ac yn ddymunol gan unigolyn i gyflawni'r rôl honno.

Mae'r meini prawf cymhwysedd y mae'n rhaid i chi ddangos tystiolaeth ohonynt wedi'u nodi ar ddiwedd y ddogfen. Caiff y meini prawf cymhwysedd eu dangos ar ffurf tabl.

 

Wrth gwblhau eich cais, sicrhewch eich bod ond yn cwblhau'r adrannau wedi'u marcio â ‘✔' yn y tabl. Peidiwch â chwblhau’r meini prawf sydd wedi'u marcio â ‘X’ gan na fydd y rhain yn cael eu hasesu. Caniateir 500 gair ar gyfer pob maen prawf – ni fydd y cyfrif geiriau yn cario drosodd i'r maen prawf nesaf.

Er mwyn dangos tystiolaeth o feini prawf cymhwysedd perthnasol, bydd angen i chi ddarparu enghreifftiau penodol o dasgau gwaith rydych wedi'u cyflawni neu ddigwyddiadau rydych wedi'u mynychu. Gallwch hefyd nodi sgiliau neu brofiadau rydych wedi'u hennill drwy wneud gwaith gwirfoddol, gwaith yn eich cartref eich hun neu yn yr ysgol, y coleg neu'r brifysgol, yn ogystal â sgiliau a phrofiadau rydych wedi'u hennill drwy waith â thâl.

Nid yw'n hanfodol darparu tystiolaeth ar gyfer pob pwynt unigol – bydd un enghraifft yn aml yn ymdrin â nifer o feini prawf allweddol ac, felly, yn aml gall fod yn addas darparu un senario sy'n disgrifio nifer o sgiliau neu rinweddau personol.

Rydym am wybod am yr hyn y gwnaethoch CHI ei ddweud neu ei wneud ar adeg benodol er mwyn delio â'r sefyllfa. Felly, mae'n bwysig bod yr enghreifftiau y byddwch yn eu rhoi yn sôn am eich profiadau chi, a'u bod mor fanwl â phosibl. Rydym yn disgwyl i'ch atebion fod yn berthnasol ac yn gydwybodol. Ceisiwch osgoi defnyddio jargon a bratiaith gan fod hyn yn annerbyniol.

Efallai eich bod eisoes yn defnyddio strwythur ateb rydych yn gyfforddus ag ef, ond os nad ydych, gall STAR fod yn ddefnyddiol i'w ystyried pan fyddwch yn rhoi ateb a strwythur i'ch asesiad ysgrifenedig.

STAR:

• Mae S yn sefyll am Sefyllfa (Situation) – Disgrifiwch ddigwyddiad neu sefyllfa yr oeddech ynddo/ynddi. Gallwch ddewis sefyllfa o brofiad gwaith, addysg, swydd wirfoddol, neu unrhyw ddigwyddiad perthnasol arall. Byddwch mor fanwl â phosibl.
• Mae T yn sefyll am Tasg (Task) – Esboniwch y dasg benodol yr oedd yn rhaid i chi ei chwblhau.
• Mae A yn sefyll am Gweithredu (Action) – Disgrifiwch y camau gweithredu penodol a gymerwyd gennych i gwblhau'r dasg.
• Mae R yn sefyll am Canlyniad (Result) – gorffennwch â chanlyniadau eich camau gweithredu a'r casgliad.

Caiff y cymwysterau sy'n ofynnol ar gyfer rôl eu nodi'n glir ym mhroffil y rôl. Mae'n bwysig y gallwch ddangos tystiolaeth eich bod wedi cyrraedd y lefel ofynnol, hyd yn oed os nad y lefel a nodwyd yw'r un uchaf. Er enghraifft, os oes gennych radd ond mae proffil y rôl yn nodi mai TGAU yw lefel y cymwysterau, rhaid i chi gynnwys eich cymwysterau TGAU fel rhan o'r cymhwystra ar gyfer y rôl.

Diddordeb busnes yw gweithgarwch neu gyflogaeth y gallwch fod yn eu cyflawni y tu allan i'ch rôl yn Heddlu De Cymru. Gall gynnwys rolau gwirfoddol, trwydded alcohol a hefyd unrhyw rôl sy'n arwain at elw ariannol e.e. rhentu eiddo. Gall rhai galwedigaethau a diddordebau busnes fod yn anghydnaws â chyflogaeth â Heddlu De Cymru. Caiff pob diddordeb busnes ei adolygu ar sail unigol.

Mae adran asesu'r ffurflen gais ar-lein ar gyfer ein swyddi Prentisiaeth, Interniaeth a Graddedig ychydig yn wahanol gan mai dim ond un bocs y mae angen i chi ei gwblhau ac mae gennych 2000 o eiriau i'w defnyddio ar gyfer yr adran hon. Bydd angen i'r adran hon ddangos eich sgiliau a'ch profiadau a'ch addasrwydd ar gyfer y rôl yn erbyn proffil y rôl. Gall fod yn ddefnyddiol ystyried yr adran hon fel eich datganiad personol; dyma eich lle chi i ddweud wrthym pam mai chi yw'r person cywir ar gyfer y rôl.

Awgrymiadau defnyddiol

• Ceisiwch beidio â gwneud datganiadau rhy gyffredinol yn eich asesiad ysgrifenedig er enghraifft ‘Rydw i'n dda am gyfathrebu’. Nid yw hyn yn benodol ar gyfer eich sgiliau a'ch talentau ac ni fydd yn dangos eich galluoedd. Os byddwch yn sylweddoli eich bod yn gwneud hyn, ychwanegwch enghraifft o adeg y gwnaethoch ddangos y sgil, er enghraifft ‘Rydw i'n dda iawn am gyfathrebu, er enghraifft fel rhan o fy astudiaethau is-raddedig presennol rydw i wedi ....’
• Nod y ffurflen gais yw dangos eich sgiliau. Pan fyddwch yn rhoi enghreifftiau ceisiwch osgoi cyfeirio at ‘ni’ ac yn hytrach ceisiwch eu strwythuro â ‘fi’ a chanolbwyntio ar y rôl oedd gennych.
• Darllenwch bob adran o broffil y rôl er mwyn sicrhau eich bod yn deall holl ofynion y swydd.
• Adolygwch y meini prawf cymhwysedd hanfodol ar gyfer proffil y rôl y bydd angen i chi ddangos tystiolaeth ohonynt yn eich cais, dyma'r adrannau a nodir a rhoi ‘YDW’ ar dudalen olaf proffil y rôl. Dim ond ar gyfer y meysydd hyn y bydd angen i chi ddangos tystiolaeth.
• Ailddarllenwch eich cais er mwyn gwirio'r sillafu, y gramadeg a'r fformatio cyn ei gyflwyno.
• Cwblhewch eich cais mewn da bryd cyn y dyddiad cau.

Os oes gennych unrhyw gwestiynau am eich cais ar gyfer Rhaglen Brentisiaeth, Interniaeth neu Raddedig - gan gynnwys cymorth i wneud cais - anfonwch e-bost at [email protected]

Dysgwch fwy am y rolau hyn:

Cyfleoedd Prentisiaethau

Cyfleoedd i Interniaid

Cyfleoedd i Raddedigion

Bydd angen i bawb sy'n ymuno â Heddlu De Cymru gwblhau proses fetio diogelwch. Byddai'n ddefnyddiol i chi ddechrau casglu'r canlynol gan y byddant yn ofynnol fel rhan o'r broses hon:

 

• Hanes eich cyfeiriad dros y pum mlynedd diwethaf
• Manylion eich incwm a'ch gwariant misol
• Manylion eich cynilion a'ch benthyciadau
• Erioed wedi cael eich datgan yn fethdalwr neu wedi cael Dyfarniad Llys Sirol? Prawf o ddyled sy'n cael ei thalu
• Manylion unrhyw gyflogaeth eilaidd neu fuddiannau busnes
• Eich partner a hanes ei gyfeiriad dros y pum mlynedd diwethaf

 

Casglwch fanylion eich teulu/ffrindiau/cysylltiadau, h.y.:

• Eich rhieni a rhieni eich partner
• Eich brodyr a chwiorydd, gan gynnwys hanner frodyr a chwiorydd a llysfrodyr a chwiorydd
• Eich plant (os ydynt dros 10 oed)
• Pawb sy'n byw gyda chi yn eich cyfeiriad presennol (e.e. lletywyr)
• Unrhyw gysylltiadau troseddol
• Unrhyw rybuddion, euogfarnau neu hysbysiadau cosb benodedig

Casglwch fanylion unrhyw gysylltiad blaenorol â'r heddlu, e.e.:

• Os ydych erioed wedi cael eich arestio
• Os ydych erioed wedi bod yn destun ymchwiliad
• Unrhyw droseddau traffig (heb gynnwys troseddau parcio)

Caiff sgiliau Cymraeg eu cynnwys ar bob proffil rôl. Pan fydd y rhain yn hanfodol, efallai y cewch eich asesu ar eich gallu yn y Gymraeg fel rhan o'r broses gwneud cais. Pan fydd y rhain yn ddymunol, gallwch wneud cais ar gyfer y rôl a byddwch yn cael hyfforddiant llawn a chymorth pan fyddwch wedi ymuno â ni er mwyn cyflawni'r lefel ofynnol yn y Gymraeg.

Dylech. Byddwch yn cael cyfle i gynnwys pob iaith y mae gennych lefel o sgil ynddi fel rhan o'r ffurflen gais a byddem yn eich annog i'w cynnwys. Gall y rhain fod ar unrhyw lefel o sgyrsiol i rugl.