Canllawiau ar ymgeisio ar gyfer swyddogion yr heddlu
Dilynwch y cyngor canlynol yn ofalus er mwyn eich helpu i lenwi eich ffurflen gais ar-lein; gall peidio â gwneud hynny olygu y caiff eich cais ei dynnu'n ôl.
O ran ceisiadau swyddogion yr heddlu a gyflwynir i Heddlu De Cymru, sicrhewch eich bod yn gwneud y canlynol:
- Darllen y meini prawf cymhwysedd ar gyfer Swyddog yr Heddlu i wneud yn siŵr y gallwch fodloni'r holl ofynion sy'n hanfodol ar gyfer y rôl, er enghraifft;
-
- Mae'n bwysig eich bod yn gallu cyrraedd safon ffitrwydd cyn i chi ystyried gwneud cais am y rôl hon, neu'ch bod yn anelu at gyrraedd y safon honno. Os byddwch yn llwyddo yn y ganolfan asesu, cewch eich gwahodd i fynychu prawf ffitrwydd: bydd angen i chi gyrraedd y lefel ffitrwydd a bennwyd er mwyn symud i gam nesaf y broses gwneud cais. Yn union cyn i chi gael eich penodi, gofynnir i chi fynychu prawf ffitrwydd cyn penodi. Os byddwch yn methu'r prawf hwn – ni waeth beth oedd canlyniadau eich profion ffitrwydd blaenorol – ni fyddwch yn gymwys ar gyfer rôl Swyddog yr Heddlu a chaiff eich cais ei dynnu'n ôl.
- Mae'n bwysig eich bod yn ystyried eich Mynegai Màs y Corff (BMI) – gofynnir i chi ddatgelu hyn os byddwch yn llwyddiannus yn y ganolfan asesu. Byddwn yn anfon ffurflen feddygol atoch i chi ei chwblhau sy'n cynnwys y wybodaeth ddatgelu hon. Mae'n bwysig cynnal pwysau iach er mwyn cael eich ystyried ar gyfer y rôl hon. Nid ystyrir ymgeiswyr am swyddi Swyddog yr Heddlu sydd â BMI dros 32 yn addas oni bai bod canran eu braster yn llai na 30% i ddynion neu 36% i fenywod. Gallwch gadarnhau eich BMI ar wefan y GIG.
- Mae'n bwysig eich bod yn gallu cyrraedd y safonau fetio sy'n ofynnol ar gyfer y rôl. Dylech gyfeirio at Ganllawiau'r Swyddfa Gartref os bydd angen rhagor o wybodaeth arnoch mewn perthynas â hyn. Fel arall, cysylltwch â'r Tîm Recriwtio a fydd yn barod i'ch helpu ag unrhyw ymholiadau.
-
- Darllenwch y cwestiynau yn ofalus cyn i chi eu cyflwyno; dylech ddarllen eich cais er mwyn gwirio'r sillafu, y gramadeg a'r fformatio a bwrw golwg dros eich atebion eto cyn eu cyflwyno. Os bydd gwall yn y cais a gyflwynwyd gennych, cysylltwch â'r tîm recriwtio er mwyn ei gywiro. Peidiwch â chreu cais arall gan y bydd y system yn ei nodi fel cyflwyniad dwbl.
- Edrychwch ar y llwybrau mynediad gwahanol a'r gofynion cymwysterau sydd ynghlwm wrthynt a sicrhewch eich bod yn gymwys ar gyfer y llwybr mynediad dan sylw.
- Gwnewch yn siŵr eich bod wedi darparu'r holl wybodaeth berthnasol a bod yr hyn y byddwch yn ei gyflwyno yn wir.
- Mae gennym yr hawl i gau ein hymgyrchoedd recriwtio Swyddogion yr Heddlu pan fyddwn wedi cael digon o geisiadau. Felly mae'n hollbwysig eich bod yn cwblhau eich cais cyn gynted â phosibl ar ôl i'r swydd wag gael ei hysbysebu. Ar ôl i swydd wag gau, dim ond ceisiadau a gwblhawyd yn llawn a gaiff eu prosesu, felly mae'n bwysig bod eich holl wybodaeth yn barod gennych i'w chyflwyno. Mae'r dogfennau gofynnol wedi'u rhestru isod;
Dogfennau gofynnol
Gofynnir i chi ddarparu'r canlynol fel rhan o'ch cais ar gyfer rôl Swyddog yr Heddlu. Felly mae'n bwysig bod y canlynol yn barod gennych:
- Copi electronig o'ch cymhwyster ffurfiol uchaf. Bydd yn ofynnol i chi ddarparu copi electronig o brawf o'ch cymhwyster pan fyddwch yn gwneud cais. Gall gymryd cryn dipyn o amser i gael gafael arnynt gan eich darparwr addysg felly rydym yn argymell y dylech ofyn amdanynt cyn gynted â phosibl. Lle bydd rôl yn nodi lefel benodol fel gofyniad – Lefel 3 er enghraifft – mae'n bosibl y bydd yn ofynnol i chi gyflwyno hyn hefyd fel rhan o'ch cais.
- Lle y bo angen, copi electronig o brawf o'ch hawl i aros yn y Deyrnas Unedig.
- Lle y bo angen, copi electronig o'ch trwydded yrru, y blaen a'r cefn.
- Lle y bo angen, adroddiad diagnostig llawn i oedolion (dros 16 oed) os ydych yn ymgeisydd sy'n gwneud cais am addasiadau rhesymol. Mae rhagor o wybodaeth am addasiadau rhesymol i'w gweld yma.
- Lle y bo angen, ffotograffau clir o unrhyw datŵs y gellir eu gweld – llun agos yn dangos y manylion a llun yn dangos lleoliad y tatŵ ar y corff. Nid yw tatŵs ar yr wyneb, y gwddf na'r dwylo yn cydymffurfio â Chanllawiau'r Swyddfa Gartref na Pholisi Ymddangosiad Cyhoeddus Heddlu De Cymru. Byddwn yn ystyried pob tatŵ yn unigol, gan gynnwys tatŵs a gaiff eu hystyried yn orliwgar neu'n sarhaus
Byddwch yn ymwybodol, os bydd unrhyw broblemau yn dod i'r amlwg mewn perthynas â'r dogfennau uchod ar ôl i chi gyflwyno eich cais, bydd ein tîm Recriwtio yn cysylltu â chi i gael esboniad am wybodaeth neu i ofyn am ddogfennau wedi'u diweddaru. Bydd hyn yn arwain at oedi wrth brosesu eich cais.
Cwestiynau cyffredin am y canllawiau ar ymgeisio
Er y gallwch gyflwyno ceisiadau i heddluoedd eraill ar gyfer rôl Swyddog yr Heddlu a rolau plismona eraill ar yr un pryd, polisi Heddlu De Cymru yw gofyn i chi benderfynu pa heddlu rydych am iddo ystyried eich cais os byddwch yn llwyddiannus yn y ganolfan asesu genedlaethol. Rydym yn gwerthfawrogi eich cydweithrediad yn hyn o beth.
Os byddwch wedi cyflwyno cais am rôl Swyddog yr Heddlu gyda Heddlu arall, mae'n rhaid i chi nodi hyn wrth gyflwyno cais i Heddlu De Cymru, ni waeth pa gam o'r broses recriwtio rydych wedi ei gyrraedd gyda'r cais hwnnw.
Os byddwch yn gwneud cais newydd ar gyfer rôl Swyddog yr Heddlu i Heddlu arall, neu os cewch eich gwahodd i ganolfan asesu, tra bod eich cais i Heddlu De Cymru wrthi'n cael ei brosesu o hyd, mae'n rhaid i chi roi gwybod i'n tîm Recriwtio.
Os byddwch wedi mynychu canolfan asesu genedlaethol yn ystod y 24 mis cyn cyflwyno eich cais ac wedi llwyddo ym mhob cymhwysedd, gallwch ofyn i drosglwyddo’r sgôr hon i ymgyrch recriwtio Heddlu De Cymru. Bydd angen i ni gael copi electronig o'ch adroddiad adborth gan y Coleg Plismona fel tystiolaeth er mwyn gwneud hyn. Noder mai dim ond yn ystod ymgyrch recriwtio fyw y gallwn ystyried ceisiadau i drosglwyddo sgôr. Ni fyddwn yn ystyried ceisiadau i drosglwyddo y tu allan i'r cyfnod hwn.
Os bydd angen unrhyw wybodaeth arnoch am drosglwyddo sgorau, neu os byddwch wedi mynychu canolfan asesu ond nad oes gennych brawf eich bod wedi llwyddo, cysylltwch â ni i gael cyngor pellach cyn i chi wneud eich cais.
Ni fydd modd i chi sefyll mwy na dau brawf canolfan asesu genedlaethol ar gyfer rolau Swyddog yr Heddlu yn ystod unrhyw gyfnod o 12 mis. Os na fyddwch yn llwyddo yn y ganolfan asesu, mae cyfnod aros gorfodol o dri mis cyn y bydd modd i chi ailsefyll prawf y ganolfan asesu ar-lein. Ar hyn o bryd, caiff y ganolfan asesu ar-lein ei chynnal yn allanol gan y Coleg Plismona fel canolfan asesu rithwir. Dylid cyfeirio unrhyw broblemau sy'n codi yn ystod y broses asesu at y Coleg gan nad oes gennym fynediad at y llwyfan hwn.
Os bydd eich cais i Heddlu De Cymru yn llwyddiannus, dylai ymgeiswyr fod yn ymwybodol y gellir gofyn iddynt weithio mewn unrhyw uned Plismona Lleol yn ardal Heddlu De Cymru.
Bydd ein tîm Sefydlu yn ystyried amrywiaeth o wybodaeth wrth benderfynu ar eich lleoliad, ond gofynion y sefydliad fydd y prif ffactor a gaiff ei ystyried wrth wneud penderfyniad.
Caiff ymgeiswyr gyfnod rhybudd o bedair wythnos o leiaf cyn eu dyddiad penodi, a dylent fod yn barod i roi'r un cyfnod rhybudd i'w cyflogwr presennol. Os bydd angen i chi roi cyfnod rhybudd estynedig i'ch cyflogwr, dylech roi gwybod i'r tîm recriwtio cyn gynted ag y byddwch wedi cwblhau prawf y ganolfan asesu'n llwyddiannus.
Bydd angen i chi ddarparu o leiaf dau eirda ar gyfer cyfnod o pump blynedd er mwyn ategu eich cais pan fyddwch yn ei gyflwyno. Dylai'r rhain gynnwys eich cyflogwr diweddaraf yn ogystal ag unrhyw gyflogwyr blaenorol. Os nad ydych eisoes wedi bod mewn cyflogaeth, gallwch ddefnyddio geirda academaidd neu eirda cymeriad – er na ddylai aelod o'ch teulu nac un o Swyddogion presennol yr Heddlu ddarparu geirda cymeriad.
Fel sefydliad rydym yn annog staff i ddefnyddio'r Gymraeg yn fewnol, er mwyn creu mwy o gyfleoedd i weld, clywed a defnyddio'r Gymraeg wrth weithredu ein busnes. Er y gallwch wneud cais i ymuno â'r heddlu heb unrhyw allu yn y Gymraeg, disgwylir i bob Swyddog yr Heddlu newydd gyrraedd Cymraeg lefel 2 erbyn diwedd ei gyfnod prawf. Caiff ymgeiswyr gymorth i wneud hyn pan fyddant wedi dechrau yn eu swydd, ond mae croeso iddynt ddechrau dysgu Cymraeg cyn gwneud cais.
Disodlwyd Deddf yr Iaith Gymraeg 1993 gan Fesur y Gymraeg (Cymru) 2011 ac fel rhan o'r ddeddfwriaeth newydd, mae gan y Gymraeg statws cyfreithiol cyfartal i'r Saesneg yng Nghymru, ac ni ddylid ei thrin yn llai ffafriol. Nid oes angen i gyrff cyhoeddus lunio cynlluniau'r iaith Gymraeg a'u rhoi ar waith mwyach, ond mae'n rhaid iddynt bellach gydymffurfio â chyfres o safonau Cymraeg cenedlaethol.
Bydd angen i bawb sy'n ymuno â Heddlu De Cymru gwblhau proses fetio diogelwch. Byddai'n ddefnyddiol i chi ddechrau casglu'r canlynol gan y byddant yn ofynnol fel rhan o'r broses hon:
- Hanes eich cyfeiriad dros y pum mlynedd diwethaf
- Manylion eich incwm a'ch gwariant misol
- Manylion eich cynilion a'ch benthyciadau
- Erioed wedi cael eich datgan yn fethdalwr neu wedi cael Dyfarniad Llys Sirol? Prawf o ddyled sy'n cael ei thalu
- Manylion unrhyw gyflogaeth eilaidd neu fuddiannau busnes
- Eich partner a hanes ei gyfeiriad dros y pum mlynedd diwethaf
Casglwch fanylion eich teulu/ffrindiau/cysylltiadau, h.y.:
- Eich rhieni a rhieni eich partner
- Eich brodyr a chwiorydd, gan gynnwys hanner frodyr a chwiorydd a llysfrodyr a chwiorydd
- Eich plant (os ydynt dros 10 oed)
- Pawb sy'n byw gyda chi yn eich cyfeiriad presennol (e.e. lletywyr)
- Unrhyw gysylltiadau troseddol
- Unrhyw rybuddion, euogfarnau neu hysbysiadau cosb benodedig
Casglwch fanylion unrhyw gysylltiad blaenorol â'r heddlu, e.e.:
- Os ydych erioed wedi cael eich arestio
- Os ydych erioed wedi bod yn destun ymchwiliad
- Unrhyw droseddau traffig (heb gynnwys troseddau parcio)
Cyn gwneud cais am unrhyw rôl, rydym yn eich cynghori i wneud y canlynol:
- Gwneud ymchwil i Heddlu De Cymru. Rydym yn chwilio am ymgeiswyr sy'n ymwybodol o'r hyn rydym yn ei wneud ac yn gallu dangos eu bod yn gwybod am ein gweledigaeth, ein gwerthoedd a'n moeseg.
- Gwneud ymchwil i Dde Cymru. Mae'n bwysig eich bod yn deall y cymunedau rydym yn eu gwasanaethu, yn ogystal â'r hyn rydym yn ei wneud.
- Deall y rôl rydych yn gwneud cais amdani. Rydym yn rhoi gwybodaeth gyffredinol ar ein gwefan, ond rydym hefyd yn darparu proffil rôl llawn i ategu pob rôl rydym yn ei hysbysebu. Dylech ei ddarllen yn fanwl ac ystyried a yw'r rôl hon yn addas ar gyfer eich doniau, eich diddordebau a'ch galluoedd. Mae'r wybodaeth yn y ddogfen hon yn cynnwys y cymwyseddau craidd sy'n berthnasol i'r rôl a gaiff eu profi drwy'r broses gwneud cais, cyfweld ac asesu.
