Ap Technoleg Adnabod Wynebau a Gychwynnir gan Weithredwr: popeth sydd angen i chi ei wybod

Mae OIFR yn defnyddio Technoleg Adnabod Wynebau (FRT) ar ffôn symudol, sy'n cymharu llun o wyneb rhywun, sydd wedi ei dynnu ar ffôn symudol swyddogol yr heddlu, â'r Gronfa Ddata Cyfeirio Delweddau sydd wedi ei phennu ymlaen llaw er mwyn helpu swyddog i adnabod rhywun at ddiben plismona.

Pryd mae Technoleg Adnabod Wynebau a Gychwynnir gan Weithredwr (OIFR) yn cael ei ddefnyddio?

Gall swyddogion ddefnyddio'r ap symudol OIFR i gadarnhau hunaniaeth unigolyn anhysbys y maent yn amau sydd ar goll, unigolyn sy'n wynebu risg uniongyrchol o niwed difrifol neu rywun y mae'r heddlu yn chwilio amdano, pan fydd yr unigolyn hwnnw yn methu rhoi manylion, yn gwrthod rhoi manylion neu'n rhoi manylion anghywir. Gall OIFR hefyd gael ei ddefnyddio ar rywun sydd wedi marw neu sy'n anymwybodol – gan alluogi swyddogion i'w adnabod fel y gallant gysylltu â'i deulu yn gyflym.

A all OIFR gael ei ddefnyddio mewn ffordd gudd i adnabod pobl?

Na, mae OIFR yn adnodd plismona agored. Dylid defnyddio OIFR ar ôl ceisio ymgysylltiad rhwng y Swyddog â'r unigolyn anhysbys.

Pa mor gywir yw'r dechnoleg?

Dangosodd profion annibynnol gan y Labordy Ffisegol Cenedlaethol fod OIFR 100% yn gywir ac yn dychwelyd y gyfatebiaeth gywir fel y canlyniad uchaf bob tro ar gyfer unigolion yn y gronfa ddata.

Yn ôl y gosodiadau trothwy rydym yn eu defnyddio, os na fydd yr unigolyn yn y gronfa ddata, ni fydd yn dychwelyd unrhyw gyfatebiadau.

A oes unrhyw duedd ar sail hil, oedran neu rywedd yn y system?

Nac oes. Mae profion annibynnol wedi cael eu gwneud er mwyn cadarnhau nad oes unrhyw duedd y gellir ei nodi ar sail hil, rhywedd neu oedran gydag OIFR.

A yw OIFR yn gwneud y penderfyniad o ran p'un a wneir cyfatebiad?

Nac ydy, nid system OIFR sy'n gwneud y penderfyniadau. Mae swyddogion yn cael hyfforddiant penodol ar ddefnyddio OIFR a dylent wneud ymholiadau rhesymol yn seiliedig ar y wybodaeth a roddir iddynt, er mwyn pennu a oes cyfatebiaeth. Yn y pen draw, y swyddog fydd yn penderfynu a yw'r canlyniad a gafwyd yn gyfatebiaeth gywir.

Beth am hawliau preifatrwydd a chyfreithlondeb ap OIFR?

Nid yw ap OIFR yn addasu cyfrifoldebau swyddogion i gynnal ymchwiliadau yn ddiduedd a heb ofn na ffafriaeth.

Nid yw ap OIFR yn newid galluedd swyddog i ymgysylltu ag aelod o'r cyhoedd, hynny yw fel rhan arferol o ymchwiliad neu fel llinell gwestiynu sy'n benodol i benderfynu ar ffeithiau digwyddiad neu ymchwiliad.

Mae OIFR yn cefnogi swyddogion i adnabod unigolion at ddiben plismona lle y mae'n bodoli (gweler dogfennaeth OIFR am ragor o wybodaeth) ond dylid ond ymgymryd ag ef lle mae cyfleoedd rhesymol eraill i adnabod unigolyn wedi cael eu gwneud.

Mae swyddogion yn cael hyfforddiant arbenigol ar ddefnyddio OIFR, hawliau preifatrwydd a disgwyliadau ac effeithiau ar hawliau dynol wrth ddefnyddio dull adnabod wynebau.

Mae ap OIFR wedi cael ei ddylunio i hyrwyddo defnydd teg a chyfrifol gan swyddogion. Ei ddiben yw cadw'r cyhoedd yn ddiogel, gan nodi troseddwyr difrifol ac amddiffyn y rhai sy'n agored i niwed.

Mae'r data sy'n dal demograffeg, amgylchiadau a chanlyniadau yn hyrwyddo tryloywder, dangos effeithiolrwydd, cymesuredd a chydymffurfiaeth â'r ddeddfwriaeth a'r canllawiau.

A gaiff y lluniau a dynnwyd gan ap OIFR eu storio am unrhyw gyfnod o amser?

Caiff yr holl luniau a gwybodaeth fiometreg a gesglir eu dileu o'r ap yn awtomatig, heb opsiwn i'w hadfer. Mae'r unig ddata a gedwir gan yr ap yn ymwneud â dal data er mwyn caniatáu craffu ar amgylchiadau a chyfiawnhad i'w defnyddio gan swyddogion, data demograffeg er mwyn monitro ar gyfer anghymesuredd posibl o ddefnydd, a chanlyniadau er mwyn penderfynu a yw plismona yn cael budd o OIFR.

Beth yw ffynonellau'r proffiliau wyneb a ddefnyddir i gymharu'r proffiliau a dynnwyd gan OIFR?

Bydd OIFR ond yn cymharu yn erbyn lluniau a gedwir yn system rheoli cofnodion lleol Heddlu Gwent a Heddlu De Cymru. Bydd hyn yn cynnwys lluniau o'r gronfa ddata lluniau dalfa a lluniau o'r gronfa ddata unigolion coll.

A fydd fy llun yn ymddangos yn y gronfa ddata?

Mae'r gronfa ddata ond yn cynnwys lluniau o unigolion sydd wedi cael eu ffotograffu yn ein dalfeydd, yng Ngwent neu yn Ne Cymru, neu unigolion y rhoddwyd gwybod amdanynt fel rhai sydd ar goll ac mae'r risg wedi cael ei hystyried yn ddigonol i gyfiawnhau cael llun at ddibenion dod o hyd ac adnabod yr unigolyn hwnnw.

A allaf wneud cais i gael lluniau wedi'u tynnu oddi ar gronfa ddata'r heddlu?

O dan amgylchiadau penodol, mae gennych yr hawl i ofyn i ni ddileu eich data personol er mwyn sicrhau na chânt eu prosesu ymhellach lle na ellir cyfiawnhau eu cadw. Dyma'r amgylchiadau sy'n fwyaf tebygol o fod yn berthnasol:

• lle nad oes angen cadw eich data personol mwyach mewn perthynas â'r diben gwreiddiol y cawsant eu casglu a'u prosesu ar ei gyfer
• lle byddwch yn tynnu yn ôl eich cydsyniad i ni gadw eich data personol os byddwn yn dibynnu ar eich cydsyniad er mwyn eu cadw.

Nid yw'r hawl i ddileu data yn gymwys os byddwn yn prosesu eich data personol:

• er mwyn cydymffurfio â rhwymedigaeth gyfreithiol
• er mwyn cyflawni tasg yr ymgymerir â hi er budd y cyhoedd neu wrth arfer awdurdod swyddogol
• er mwyn sefydlu, arfer neu amddiffyn honiadau cyfreithiol
• er mwyn arfer yr hawl i ryddid mynegiant a gwybodaeth
• at ddibenion archifo er budd y cyhoedd neu at ddibenion ymchwil gwyddonol, ymchwil hanesyddol neu ddibenion ystadegol, lle y byddai'n amhosibl neu'n anodd iawn prosesu'r data hyn pe byddent yn cael eu dileu

Os hoffech ofyn i ni ddileu eich data personol, defnyddiwch y manylion cyswllt yn hysbysiad preifatrwydd perthnasol HDC neu HG:

Heddlu De Cymru: Hysbysiad Preifatrwydd | Heddlu De Cymru

Heddlu Gwent: Hysbysiad Preifatrwydd | Heddlu Gwent

A fydd y swyddog yn gofyn am ganiatâd cyn i ap OIFR gael ei ddefnyddio ac a allaf wrthod caniatau i swyddog heddlu ddefnyddio ap OIFR?

Dim ond ar ôl i gyfleoedd rhesymol a llai ymwthgar i adnabod unigolyn anhysbys gael eu defnyddio y dylid penderfynu defnyddio OIFR. Er mwyn cyfiawnhau OIFR, mae rhaid bod diben plismona (sail) a rhaid i'r testun fod yn anfodlon neu ni all adnabod ei hun i'r swyddog (rhesymau). Ceir rhagor o wybodaeth am hyn yn y ddogfennaeth ategol.

Bydd y swyddog heddlu yn cymryd camau rhesymol i esbonio'r rheidrwydd dros ddefnyddio ap OIFR a sut bydd y data yn cael eu defnyddio. Nid oes angen cydsyniad ar yr heddlu i ddefnyddio ap OIFR ond bydd yn gofyn am gydweithrediad yr unigolyn i wneud ei wyneb yn weladwy er mwyn tynnu ffotograff.

Os bydd yr unigolyn yn gwrthod â chaniatáu i swyddog gael llun, bydd y swyddog yn mynd yn ôl i bwerau a thactegau eraill sydd ar gael y gall eu defnyddio i ymdrin â'r sefyllfa o'i flaen. Gallai hyn gynnwys, lle mae rheidrwydd yn unol â chod G PACE (pŵer statudol) i swyddogion yr heddlu, i arestio'r unigolyn at ddibenion canfod enw a chyfeiriad.

Ni ddylai swyddogion heddlu ddefnyddio grym at ddibenion cael llun ar gyfer OIFR.

Gallai amgylchiadau ddigwydd lle mae swyddog wedi ceisio defnyddio, neu wedi defnyddio OIFR a defnyddio grym at ddiben arestio yn dilyn hynny. Dylai hyn gael ei gyfiawnhau gan y swyddog a ni ddylai fod at ddiben cael Llun Chwilota at ddibenion OIFR.

A gaiff y data eu rhannu ag unrhyw bartïon eraill?

Ni chaiff data biometrig ar ffurf lluniau a thempledi biometrig eu cadw gan OIFR a chânt eu dileu o'r ap yn awtomatig heb opsiwn i'w hadfer. Am y rheswm hwn, nid ydym byth yn trosglwyddo data biometrig neu luniau o OIFR i asiantaethau trydydd parti.

Bydd recordiadau fideo a wisgir ar y corff o ddefnydd OIFR yn cael eu cadw at ddibenion craffu a chwynion yn unol â pholisi stopio a chwilio a defnydd grym. Gall y recordiadau hyn gael eu defnyddio fel tystiolaeth ar gyfer materion dan ymchwiliad ond cânt eu rheoli yn unol â Deddf Diogelu Data 2018 a'u datgelu yn unol â Deddf Gweithdrefnau ac Ymchwiliadau Troseddol 1996.

A oes Asesiad o'r Effaith ar Ddiogelu Data (DPIA) ar gyfer y defnydd o OIFR?

Oes. Mae'r holl ddogfennau sy'n ymwneud â defnydd ap OIFR ar gael ar y dudalen Adnabod Wynebau a Gychwynnir gan Weithredwr ar wefan Heddlu De Cymru.