Cyngor ar ddefnyddio e-sgwter

Beth yw e-sgwter?

Mae sgwteri trydan (a elwir hefyd yn e-sgwteri) yn dod o dan gategori “cludwyr wedi’u pweru”; mae hyn yn cynnwys ystod o ddyfeisiau cludo personol sy’n cael eu pweru gan fodur.

Dosbarthir e-sgwteri fel cerbydau modur o dan Ddeddf Traffig Ffyrdd 1988. Mae hyn yn golygu bod y rheolau sy’n berthnasol i gerbydau modur hefyd yn berthnasol i e-sgwteri gan gynnwys yr angen i gael trwydded, yswiriant a threth.

Ar hyn o bryd nid yw’n bosibl cael yswiriant ar gyfer e-sgwteri personol, sy’n golygu ei bod yn anghyfreithlon eu defnyddio ar y ffordd neu mewn mannau cyhoeddus. Os ydych yn defnyddio e-sgwter preifat gall y cerbyd gael ei atafaelu o dan adran 165 Deddf Traffig Ffyrdd 1988 am beidio â bod ag yswiriant.

Os byddwch yn achosi anaf difrifol i unigolyn arall tra’n reidio e-sgwter bydd y digwyddiad yn cael ei ymchwilio yn yr un modd ag y byddai pe byddech yn reidio beic modur neu’n gyrru car.

Treialon e-sgwteri ar rent

Mae treialon e-sgwteri ar rent yn cael eu cynnal yn y DU. Rhaid i unrhyw un sy’n defnyddio e-sgwter ar rent ar ffordd gyhoeddus neu mewn man cyhoeddus arall gydymffurfio â’r holl ddeddfwriaeth traffig ffyrdd perthnasol neu fe allai gael ei erlyn.

Er mwyn rhentu e-sgwter mae’n rhaid i chi fodloni’r meini prawf canlynol:

• bodloni’r terfyn oedran isaf; gall y rhain amrywio yn dibynnu ar y darparwyr, felly gwiriwch gyda hwy
• bod â’r drwydded yrru gywir (categori Q neu P/M)
• bod wedi creu cyfrif gyda’r cwmni rhentu

Dim ond mewn ardaloedd sydd wedi’u cymeradwyo y gellir defnyddio e-sgwteri.

Defnydd cyfreithlon e-sgwter

Mae’n gyfreithlon i ddefnyddio e-sgwter ar dir preifat gyda chaniatâd perchennog y tir.

Mewn ardaloedd lle mae cynllun rhentu yn cael ei dreialu, mae’n gyfreithlon defnyddio e-sgwter wedi’i rentu ar ffordd gyhoeddus neu mewn lôn feiciau, cyn belled bod gennych y drwydded gywir a’ch bod yn dilyn rheoliadau traffig ffordd.

Cosbau a throseddau

Os nad oes gennych drwydded, neu’r drwydded gywir, neu os ydych yn reidio heb yswiriant gallech gael hysbysiad Cosb Benodedig ynghyd â:

• dirwy o £300 a chwe phwynt cosb ar eich trwydded am beidio â bod ag yswiriant
• dirwy o hyd at £100 a thri i chwe phwynt cosb am reidio heb y drwydded gywir

Gallech hefyd fod yn cyflawni trosedd os cewch eich dal yn: 

• reidio ar y palmant; Hysbysiad Cosb Benodedig a dirwy bosibl o £50
• defnyddio ffôn symudol neu ddyfais symudol arall a ddelir yn y llaw tra’n reidio; £200 a chwe phwynt cosb
• reidio trwy olau coch; Hysbysiad Cosb Benodedig, dirwy o £100 a phwyntiau cost posibl
• yfed a reidio: yr hyn y byddech yn ei dderbyn pe byddech yn gyrru car, gallech gael dirwyon a osodir gan y llys, gwaharddiad rhag gyrru a charchar posibl

Os ydych yn defnyddio e-sgwter yn gyhoeddus mewn modd gwrthgymdeithasol, efallai y caiff yr e-sgwter ei atafaelu o dan adran 59 Deddf Diwygio'r Heddlu. 

Pan fyddwch yn reidio e-sgwter byddem bob amser yn argymell gwisgo cyfarpar diogelwch megis helmed a chadw at y terfyn cyflymder.