Camdriniaeth ddomestig ddigidol

Camdriniaeth ddigidol yw pan fydd rhywun yn monitro, yn stelcian, yn aflonyddu, yn bygwth, yn rheoli neu'n dynwared person arall gan ddefnyddio technoleg.

Gallai hyn olygu stelcian drwy'r cyfryngau cymdeithasol, aflonyddu drwy neges destun neu fychanu rhywun drwy bostio lluniau neu fideos er enghraifft.

Gall camdriniaeth ddigidol ddigwydd i unrhyw un ond mae'n digwydd amlaf ochr yn ochr â mathau eraill o gamdriniaeth ddomestig.

Enghreifftiau o gamdriniaeth ddigidol:

• defnyddio’ch cyfrifon cyfryngau cymdeithasol heb eich caniatâd
• postio gwybodaeth amdanoch chi ar-lein neu drwy neges destun/negesydd
• creu tudalen proffil heb eich caniatâd
• anfon negeseuon bygythiol atoch chi
• anfon negeseuon bygythiol at bobl eraill ac esgus mai chi sy’n eu hanfon
• postio lluniau ohonoch heb eich caniatâd (sydd hefyd yn cael ei adnabod fel pornograffi dial)
• defnyddio ysbïwedd ar eich dyfeisiau er mwyn eich tracio
• dileu eich rheolaeth chi dros ddyfeisiau cartref clyfar fel camerâu, goleuadau, thermostatau
• rheoli’ch cyfrifon banc

Sut i amddiffyn eich hun rhag camdriniaeth ddigidol

Nid eich bai chi yw hi os ydych chi’n cael eich cam-drin: mae gennych chi hawl i breifatrwydd ar-lein ac all-lein.

Mae yna gamau y gallwch eu cymryd i gadw’ch hun yn ddiogel rhag camdriniaeth ddigidol, ond dylech bob amser wneud yr hyn sy'n ddiogel i chi.

Defnyddiwch gyfrineiriau cryf

Amddiffynnwch eich holl gyfrifon ar-lein gyda chyfrinair cryf. Os yw'r person sy'n eich cam-drin yn gwybod unrhyw un o'ch cyfrineiriau, newidiwch nhw ar unwaith. Dewiswch gyfrinair sy'n cynnwys rhifau a chymeriadau arbennig. Rhagor o wybodaeth am gyfrineiriau cryf.

Gwiriwch y gosodiadau ar gyfrifon cyfryngau cymdeithasol

Gwiriwch y gosodiadau preifatrwydd ar eich holl gyfrifon yn y cyfryngau cymdeithasol.

Mae gan y Ganolfan Seiberddiogelwch Genedlaethol gyngor ar sut i wirio’ch gosodiadau ar yr holl brif lwyfannau yn y cyfryngau cymdeithasol (Facebook, X.com, YouTube, Instagram, LinkedIn, Snapchat a TikTok).

Amddiffynnwch eich dyfeisiau

Amddiffynnwch eich ffôn, eich tabled a’ch cyfrifiaduron drwy ddefnyddio cyfrinair neu PIN cryf, neu defnyddiwch gyfuniad o'r ddau.

Gwnewch yn siŵr bod meddalwedd wrth-feirws a mur cadarn wedi'u gosod ar eich dyfeisiau a'u bod yn gyfredol. Mae hyn yn canfod ysbïwedd a allai fod wedi'i gosod ar eich ffôn ac unrhyw ffeiliau nad yw’n ddiogel eu hagor. Dysgwch fwy gan Get Safe Online.

Diffoddwch wasanaethau lleoliad

Gallwch gael eich tracio'n hawdd os yw eich lleoliad wedi’i droi ymlaen ar eich ffôn neu’ch dyfeisiau eraill. Mae rhai apiau yn troi gwasanaethau lleoliad ymlaen yn awtomatig, ond gallwch eu diffodd drwy fynd i mewn i'ch gosodiadau:

• gosodiadau lleoliad dyfeisiau Android
• gosodiadau lleoliad dyfeisiau Apple

Hanes rhyngrwyd

Os nad ydych am i rywun wybod pa wefannau rydych chi wedi ymweld â nhw, gallwch weld cyngor ar Sut i guddio’r ymweliad hwn o’ch hanes gwe.

Newidiwch eich cyfrinair Wi-Fi

Newidiwch y cyfrinair a gawsoch chi i ddechrau i gyfrinair cryfach.

Osgowch ddefnyddio’r cyfryngau cymdeithasol a bancio ar-lein wrth ddefnyddio Wi-Fi cyhoeddus gan fod hwnnw’n aml yn anniogel ac fe allai’ch manylion gael eu dwyn. I gadw'n ddiogel wrth ddefnyddio Wi-Fi cyhoeddus, cysylltwch â rhwydwaith preifat rhithwir (VPN).

Bancio ar-lein

Os ydych yn poeni am gael eich cloi allan o'ch cyfrifon banc neu’n poeni y gallai rhywun gyfyngu ar eich mynediad at eich arian, siaradwch â rhywun yn eich banc. Gall rhai banciau dynnu sylw at gyfrif a allai fod mewn perygl.

Riportiwch y peth

Os ydych chi, neu rywun rydych chi'n eu hadnabod, yn cael eich cam-drin mae yna wahanol ffyrdd ichi riportio'r peth i’r heddlu.