Gofyn am wybodaeth o dan Gyfraith Clare: Gwneud cais Cynllun Datgelu Trais Domestig (DVDS)
Nid ffurflen ar gyfer riportio cam-drin domestig yw hon. Os ydych am wneud hynny, defnyddiwch ein gwasanaeth ar-lein.
Mae’r cynllun hwn yn galluogi’r heddlu i ryddhau gwybodaeth am unrhyw hanes blaenorol o drais neu gamdriniaeth a allai fod gan berson.
O dan Gyfraith Clare gallwch:
- wneud cais am wybodaeth am eich partner presennol neu gyn-bartner oherwydd eich bod yn poeni y gallai fod ganddynt hanes o gam-drin a’u bod yn risg i chi
- gofyn am wybodaeth am bartner presennol neu gyn-bartner i ffrind neu berthynas oherwydd eich bod yn poeni y gallent fod mewn perygl
Sylwer: Nid yw’r Cynllun Datgelu Trais Domestig yn disodli gwiriadau’r Swyddfa Cofnodion Troseddol (CRB), Gwasanaeth Datgelu a Gwahardd ceisiadau gwrthrych am wybodaeth neu geisiadau rhyddid gwybodaeth (FOI).
Offeryn cyngor
Gofyn am wybodaeth o dan Gyfraith Clare: Gwneud cais Cynllun Datgelu Trais Domestig (DVDS)
Gallwch wneud cais DVDS mewn tair ffordd:
Ar-lein
Bydd angen y manylion canlynol arnoch, os yn bosibl, er mwyn gwneud eich cais:
- enw llawn ac unrhyw enwau blaenorol y person rydych yn ceisio gwybodaeth amdano/amdani (yn y broses gais yr enw am y person hwn yw’r ‘gwrthrych’)
- cyfeiriad presennol ac unrhyw gyfeiriadau blaenorol y gwrthrych yn ystod y pum mlynedd diwethaf
- byddwn yn gofyn i chi, fel rhan o’ch cais, sut yr hoffech i ni gysylltu â chi. Byddwn ond yn cysylltu â chi yn y modd hwnnw. Byddwn hefyd yn gofyn i chi pryd fyddai orau i gysylltu â chi, ee dyddiadau ac amseroedd
Cyfartaledd amser cwblhau: 15 munud.
Sylwer: Ni fyddwch yn gallu cadw eich cais wrth i chi fynd drwy’r ffurflen; bydd gennych ddwy awr i gwblhau pob cam o’r ffurflen cyn y bydd yr amser yn dod i ben.
Cliciwch 'Dechrau' isod i gychwyn eich cais.
Dros y ffôn
Gallwch wneud cais drwy ffonio 101.
Mewn gorsaf heddlu
Gallwch fynd i unrhyw orsaf heddlu i wneud cais. Bydd swyddog heddlu neu aelod o staff yr heddlu yn cymryd ychydig o fanylion ac yn sgwrsio gyda chi am y camau nesaf.
Gofynnir i chi roi eich:
- enw
- cyfeiriad
- dyddiad geni
Cytunir ar ffordd ddiogel i gysylltu â chi a byddwn yn cynnal rhai gwiriadau cychwynnol er mwyn gwneud yn siŵr nad oes unrhyw berygl neu bryderon sydd angen sylw ar frys. Os oes, neu os ydych yn dweud wrthym fod trosedd wedi digwydd (mae cam-drin domestig yn drosedd), efallai y byddwn yn gweithredu ar hynny.
Beth sy’n digwydd wedi i mi wneud cais?
Ein nod yw cynnal adolygiad cychwynnol o’r cais o fewn 24 awr er mwyn asesu’r canlynol:
- a fydd y cais yn mynd rhagddo
- a oes unrhyw risg ar hyn o bryd
Os bydd y cais yn mynd rhagddo caiff ei gyfeirio i dîm / uned er mwyn dilyn i fyny arno a bydd yn ceisio cysylltu â chi ynglŷn â chyfarfod wyneb yn wyneb, os oes angen un, o fewn 10 diwrnod gwaith i chi wneud eich cais.
Bydd angen i chi ddod â phrawf adnabod i’r cyfarfod hwnnw, yn ddelfrydol dull adnabod llun sydd â’ch dyddiad geni a’ch cyfeiriad arno (ee pasbort neu drwydded yrru).
Os nad oes gennych basbort neu drwydded yrru, efallai y byddwn yn derbyn math arall o ddull adnabod llun, tystysgrif geni, bil cyfleustodau neu gyfriflen banc.
Os byddwn yn penderfynu rhannu gwybodaeth am y person rydych yn holi yn ei gylch, byddwn ond yn rhannu’r wybodaeth honno gyda’r person sydd mewn perygl o gael ei niweidio neu’r person sydd yn y sefyllfa orau i ddiogelu’r person rhag niwed.
Os ydym yn credu bod rhywun mewn perygl, byddwn ni neu ein hasiantaethau partner yn gweithredu.
Ein nod yw cwblhau ceisiadau o fewn 28 diwrnod gwaith, ond gallai fod rhesymau pam ei bod yn cymryd yn hwy na hyn. Os ydyw, byddwn yn rhoi gwybod i chi.
Os ydych chi’n meddwl bod rhywun mewn perygl, neu eich bod yn amau neu’n gwybod am gam-drin domestig sy’n digwydd, ffoniwch ni ar 101 neu ei riportio ar-lein.